Shillong, Naitung 02
U MDC ka Laban-Mawprem Konstitwensi Bah Ricky Shullai u la ong ba u Bah Sanbor Shullai uba dei u MLA ka South Shillong bad ruh u Myntri ka Sorkar Jylla u khlem kynjoh ktien ïa u haba u leit ïakynduh ïa u Lat ka Jylla ha kine ki sngi ban pyrshah ïa ka jingpynbeit thymmai ïa ki kyndon ha ka Khasi Hills Autono-mous District (Trading by Non-Tribals) (Amend -ment) Bill, 2026.
Haba ïakren bad u Bah Ricky ha ophis trekam jong u ha Lawsohtun, u la ïathuh ba kane ka bill ba la dep mynjur ha ïingdorbar ka KHADC kaba dei ka “Non-tribal Labour Ser-vice Licence” ka long tang ïa kito ki nongbylla kiba wan na kiwei ki Jylla ban pynbiang ïa ki kot ki sla.
U la ïathuh ba ha kane ka jingpynkylla thymmai la ai bor ïa ki dorbar shnong ban ai jingmynjur haba ki pyndap ha ka phom, kane ka long shibynta ban ïada ïa ka jaidbynriew hynrei ym shym la ong ïa ki bar jylla kiba la sah hangne ha Jylla.
U la pynpaw ka jingsngew lyngngoh ba u Bah Sanbor u la leit pyrshah haba ka KHADC kam shym pat phah ïa kane ka bill sha ka District Council Affairs jong ka Sorkar Jylla hynrei u kyrmen ba u Lat un sa mynjur namar kane ka juh ka bill kaba la phah da ka JHADC u Lat ka Jylla u la dep mynjur.
“Ïa kane ka juh ka bill ka JHADC la mynjur ha ka 22 tarik Naiwieng 2015 bad u Lat ka Jylla u la ai jingmynjur ha u 2016, kumta na ka liang ka KHADC ka la wanrah ïa kane ka bill mynta u snem da ka jingai jingmut u Symbud Myntri Rangbah ka Jylla Bah Prestone Tynsong uba bat ïa ka DCA,” u la ïathuh.
U Bah Ricky u la pynpaw hadien ba ki Hima Khasi ki la pynïasoh bad ka ri India, baroh kiba sah ha Meghalaya ki ïa burom mar kylliang hynrei dei ki trai jylla kiba shah lehbeiñ namar bun kiba shong dukan harud surok katba ki bar jylla ki ïoh die jingdie da kaba shong ha ki dukan ha Iewduh.
“Lada u Bah Sanbor u la wan ïakynduh ïa nga, nga la ïoh ban pynshai ïa kane ka bill hynrei mynta nga la shah kynnoh lang ba nga pyrshah ïa kane ka bill,” u la ong biang.
