Shillong, Naitung 02
Kawei ka longkmie ka la duh noh ïa la ka jong ka jingim hadien ba la kynnoh ba ka la shah shoh shah tied ha la u jong u kurim bad ki bahaïing jong u.
Katkum ka tyllong khubor kaba la ïoh la ong ba ha ka step jong ka sngi Palei, u Chandmamuth Sk, uba na ka shnong Bhangarpar u la leit mih ha Boghlarbitha OP bad ban pyntip ba ka para jong u, ka Salema Khatun ka la shah tied shah bom ha u kurim jong ka, u Saddam Hussain bad ha ki bahaïing jong u, ha kaba ka la khlad noh namar ka jingjur jong ka jingmynsaw.
Shuh shuh la ong ba haba ki pulit ki la wan poi ha ka jaka ba kane ka jingjia ka la jia, ym shym la don mano-mano ruh na ka liang ki bahaïing ka longkmie kaba khlad lait noh tang ka hynmen kynsi jong kaba ïap.
Ha ka por ba la pynlong ïa ka jingtohkit, ki bahaïing jong ka longkmie kaba khlad bad u para ki la ong ba ka Salema Khatun ka ju shah leh beiñ bad shah shoh na ka por sha ka por ha u kurim jong ka. La ong ruh ba u Saddam u ju dawa pisa na ki bahaïing jong ka kurim jong u.
Kane ka jingjia ka lah ban dei kaba la jia ha ka por mynmiet, ha kaba ïa ka metïap la pynkit noh sha ka hospital ha Assam da u kurim bad ki bahaïing jong u, hynrei namar ka jingtieng ba ïoh lah ban ithuh ïa ki, kumta la kynnoh ba u kurim ryngkat bad ki bahaïing jong u, ki la phet krad na hospital bad ieh noh ïa ka metïap.
Ki bahaïing jong ka Salema Khatun ki la tip halor kane ka jingjia, hadien ba la pyntip sha ki da u Saddam, ha kaba la ong ba u la pyntip sha ki ba ka khun jong ki, ka don ha ka hospital ha Assam bad mar mar ki la leit sha kane ka hospital bad ha kaba ki la lap tang ïa ka metïap.
Ha kaba ïadei bad kane ka jingjia, la dep ban register ïa ka case bad ka ejahar.
