Shillong, Naitung 02
U Myntri Rangbah ka Jylla Conrad K Sangma ha ka sngi Palei u la plie ïa ka Boarding Building ba dang shu tei thymmai jong ka skul Pine Mount ha ka jingïadonlang u Myntri ka tnad Pule Puthi Bah Lahkmen Rymbui, kaba pyni ïa ka jingpynurlong ïa ka jingkular bala ai sha ki khynnah skul hadien ki jingpynsngew ïa ki jingeh namar ka jingbym biang ki hostel ha u snem 2022.
Haba pynkynmaw ïa ka jingleit jong u sha kane ka skul ha u Risaw 2022, u Myntri Rangbah u la ong ba u sngewshon bha ban tip ïa ki jingeh ba la mad da ki khynnah ba sah boarding, kiba la pynsngew ïa ki jingeh kum ka jingpei ka tnum, jingsniew ka madan bad ka jinglong jingman ka bym shngaiñ ban sah.
“Ha ka por ba nga wan sha ka skul ha u 2022, nga la ïakren bad ki khynnah pule bad la ïohi markhmat ïa ki jingeh kaba ki hap ban mad. Ka jinglong jingman ka hostel kam dei tang ba kam long kaba biang, hynrei ka ktah ruh ïa ka bha ka miat bad ka pule puthi jong ki khynnah,” u la ong.
Haba shimkhia ïa ki jingeh jong ki, u Myntri Rangbah u la bthah ban leh eiei mardor bad kular ïa ki khynnah pule ba ïa ka boarding hostel yn sa tei thymmai. Haba wan biang sha campus ha ka sngi Palei, u la pynpaw ïa ka jingsngewhun ban ïohi ba ki jingkular kila urlong shisha.
Haba ban jur ïa ki thong kiba bun jong ka Sorkar, u Myntri Rangbah u la ïai ban ba ka pule puthi ka dang long ka kam ba hakhmat eh bad ka jingpynbha ïa ki jingtei ka dei ka sienjam ba kongsan ha kaban pynthikna ïa ka jingmih ba kham bha na ki jingpule. U la pynpaw ruh ba ki jingkylla kiba don jingmut kim wan jia tang ha ka shimiet hynrei ka donkam ïa ka jingpyrshang kaba ïai bteng, ka jingkut jingmut bad ka jingshimkhia ïa ki jingdonkam jong u paidbah.
“Ki jingkylla ki shimpor, hynrei kaei kaba kongsan ka long ba ngi leh ïa ki kam haba ngi ïohi ïa ki jingdonkam. Kawei ka sienjam kaba rit ruh ka long kaba kongsan. Lada ngi sngap, jubab, bad trei khlem sngeh, ngi lah ban wanrah ïa ka jingkylla kaba shisha,” u la ong.
U la pynlait ruh ïa ka prokram “She Thrives”, ka sanitary pad vending machine kaba don bad ki sanitary pad, kaba thmu ban kyntiew ïa ka khuid ka suba bad ka burom ki khynnah skul kynthei. Kane ka prokram ka long shibynta na ki jingpyrshang ban weng ïa ki jingeh kiba mad na ka sngi sha ka sngi da ki khynnah kynthei ha ki skul. U pyntip ba ïa kane ka prokram yn sa pyntreikam ha baroh kawei ka Jylla ban pynthikna ba man ki khynnah kynthei kin ïoh ïa ki jingdonkam ha ka jingleh khuid.
Ha ka jingïalang ïakren markhmat bad ki khynnah skul, u Myntri Rangbah u la ai jubab ïa ki jingkylli haba ïadei bad ki kabu ïohkam ïohjam bad ka lawei jong ki khynnah mynta. U la batai ba katba ka jingdon ki kam Sorkar ka long kaba duna bha, ka Sorkar kala thaw ïa ki policy bad ki prokram ban thaw ïa ki lad ki lynti lyngba ka jingsengkam sengjam bad ka jingkiew ha ka kam shimet.
“Ngi dei ban sngewthuh ïa ka jingshisha, manla u snem da ki hajar ngut ki samla ki rung ha ka jylli wadkam, hynrei tang khyndiat tylli ki kam Sorkar ki don. Kumta, ka lawei ka shong ha ka sengkam lajong, ka buit treikam thymmai bad ki kompani shimet,” u la ong.
U la batai shuh shuh ba ka Sorkar kala kynshew ha ki kam kiba kongsan kum ka kam jngohkai, IT, ka rep ka riang, bad food processing ban lah aikam aijam bad kyrshan ïa ki samla kiba angnud ban sengkam lajong.
