Shillong, Naitung 03
U Commissioner & Secretary ka tnad bording, u Sanjay Goyal, ha ka Sngi Thohdieng u la ong ba ka Jylla ka dang khmih bniah ïa ki jingtyrwa na ka bynta ka ‘Thermal Power Plant’ banyngkong jong lajong ha ryngkat ka jingpyntikna ïa ka jingpynbiang ba khlem jingthut watla ka jingpynmih bording ka la duna bad ka jinglah ban kiew ha ka liang ka jinglut-jingsep.
Ki jingïakren haba ïadei bad kane ka bynta ki dang ïaid shakhmat.
“Ngi dang wad ïa ka lad bad ngi la ïoh pdiang katto-katne ki ‘Expression of Interest’ na ki katto-katne ki kynhun. Ngan ym pat ong ba ka dei ka lynnong kaba la khylliap noh ïa mynta,” la ong u Goyal.
U la bynrap ba ïa ki jingdonkam ‘Thermal’ ba mynta la pynbiang lyngba ki jingïateh kiba shabar.
“Ha kaba ïadei bad ka jingshim bording jong ngi, namar ka jingdon jong ka bording na NTPC Bongaigaon, ngi long kiba biang haba phai sha ka jingdon jong ka ‘Thermal’,” u la ong.
“Hynrei hooid, haba ïadei bad ka ‘Thermal Power Plant’ jong lajong, kiei-kiei ki dang don ha ka jingpynkhreh bad nga khmih lynti ba la kumno-kumno ngin sa lah ban pynbeit ïa kawei ka projek ha ki sngi ban wan,” u la ong.
U Goyal u la ong ba ka jingthmu jong ka tnad bording ka long halor ka jingdon ba pura ban ïa ka jingpynmih bording tang na kawei ka tyllong.
“Ka jingdon jong ka bording kam dei shaphang ka jingdon jong ka ‘Hydro Power’, ka bor na ka lyer, ne bording ‘Thermal’. Ka dei shaphang ka jingdon bording baroh kawei,” u la ong.
Ka Jylla ka donkam 180 haduh 200 ‘megawatt’, ha kaba ka jingpynmih bording ka long kaba la pynbeit katkum ka rukom hap slap.
“Lada ngi pynmih na baroh ki ‘Station’ ha ka jinglah kaba pura, kan ïaid palat ïa ka 200 ‘megawatt’. Hynrei ïa kata ym donkam,” u la ong.
Na ka liang jong u, u la ong ba ka tnad ka buh hakhmat eh ïa ki ‘Station’ kiba ïaid lyngba ki wah.
“Ngi thmu ïa ka jingpynmih bording jong ngi katkum ka jingdon ka jinghap slap, khamtam eh na ka bynta ki projek kiba ïaid lyngba ki wah, kiba dei ka Leshka bad, haduh katto-katne, ka Ganol,” la batai u Goyal.
“Kumta, ngi pyndonkam nyngkong eh ïa kito ki ‘Station’ pynmih bording ha ka liang ka jingpynmih, da kaba buh ïa ka Umïam kum ka jaka pynlang um bad pyndap ïa ka,” u la ong.
Ka jingmih jong ka Leshka ka la hiar na kaei kaba ju long.
“Ka jingtip jong u bnai ba la dep, haba phai sha ka Leshka, ka long kaba kham biang – ym haduh katta-katta kumba ngi ju ïoh, hynrei, kam da sniew than hi ruh. Ngi dang ïoh kumba 70 haduh 80% na ka jingpynmih,” u la ong.
Ka jingkynriah sha ki tyllong kiba kham rem ka lah ban ktah ïa ka mang tyngka, watla ka jingkheiñ kaba khatduh ka dang sahteng.
“Ka lah ban don ka jingktah khyndiat ha kaba ïadei bad ka jinglut-jingsep, hynrei ngan ym don ha ka kyrdan ban ong eiei ïa mynta, namarba kane ka dei ka rukom kaba man ka sngi,” u la ong.
“Ngin sa lah ban pynbeit ïa ka lehse ha kaba kut jong u bnai ne ki 3 bnai ban kdew kaei ka jingktah kaba la wan jia,” ong u Goyal.
Watla ka don shuh ka jinglut, u Goyal u la ong ba kan ym don kano-kano ka jingpynlip bording.
“Kane ka dei ka jingkular jong ngi: wat hapdeng ka jinglut kaba lah ban kham heh khyndiat, ngin ym leit sha kano-kano ka jingpynbeit kyndon haba ïadei bad ka bording ne kano-kano ka jingpynlip bording. Ka jingkular jong ngi ka long na ka bynta ka jingpynbiang bording kaba 24 kynta sha ka Jylla,” u la ong.
Halor ka bording kaba lah ban pynthymmai, u la ong ba ka jingshim bording na ki tnum ïing ka ïai long kaba suki namar ka jinglong-jingman ka suiñbneng.
“Ka dei ka jingthmu jong ngi baroh ban leit sha ka rukom kaba khuid ba suba bad ban pyrshang pyndonkam ïa ka bording na ka sngi. Kaba sngewsih ka long ba ka jingdawa hapoh ka skhim ‘Rooftop Solar’ kam shym la kiew ha ka rukom kaba ngi kwah,” u la ong.
“Ka Meghalaya ka don ïa ka aïom slap kaba kham slem. Hooid, ngim lah ban ïanujor ïa ka jingpynmih bad ki Jylla ba heh ne kiba don ha ka phang sepngi kum ka Rajasthan ne Gujarat, ha kaba ka jingdon jong ka bording na ka sngi ka long kaba heh bad kaba lah ban shaniah ban ïa ka jong ngi,” kdew u Goyal.
Na ka liang ka tnad mynta ka thmu ban pynbha ïa kane ka skhim.
“Ka la nang kiew suki-suki hangne, bad nga khmih lynti ba ha ki sngi ban wan, ngin sa thaw katto-katne ki buit halor kumno ban pynlong ïa ka kaba kham itynnad khyndiat ïa ki paidbah ban aplai ïa katei ka skhim,” u la ong.
