Shillong, Naitung 05
Ha kine ki khyndiat snem ba la leit noh, ka Jylla Meghalaya ka la mad ïa ka jingkiew stet ha ka jingdon jong ki briew kiba im bad u khñiang jingpang HIV, kaba la kylla long kawei na ki mat ba khia tam ha ka imlang sahlang, watla ka don ka jingpyrshang na kiba bun ki liang, ban ïaleh katba lah ban teh lakam ïa u ne u khñiang jingpang.
Ha kane ka Jylla, ka Meghalaya Aids Control Society (MACS), kadei kawei na ki shnat treikam kaba la lah ban khmih bniah halor kane ka bynta bad ka ju ïai trei barabor ban pynlong ïa ki jinghikai halor u ne u khñiang jingpang bad kumjuh ruh ban ai ka jingsumar sha ki briew kiba im bad u HIV.
Ha ka jingpyrshang ban sngewthuh ka jingkiew jong kane ka jingpang bad ka jingeh kaba ka MACS ka shem, la ïoh ban ïakren bad ka Dr. KL Ïawbor, ka Joint Director ka Health Services bad Project Director ka MACS.
Ha ka jingïakren bad ka Dr. Ïawbor, ka la ïathuh ba ka jingeh kaba ki ïakynduh kadei halor ka Laws to Follow Up, da kaba kdew ba bun napdeng kiba don ïa kane ka jingpang watla ki tip ba ki pang, kim treh ban dih dawai satia, khamtam kiba wan na ki thaiñ nongkyndong namar kiba bun ki daw.
Ka Dr. Ïawbor ka la ïathuh, ba ïa mynta katkum ka Cumulative Programmatic Data, ki don haduh 11570 ngut kiba don ïa kane ka jingpang bad katkum ka Estimate Data, ki don haduh 9664 ngut.
Ha kawei ka liang, ka Dr. Ïawbor ka la pyntip ruh ba ki khyllung kiba don ïa kane ka jingpang, ki don kumba 500 ngut ei-ei ha kane ka Jylla ryngkat ka jingpynshai ba ki don shibun ki jingïarap na bynta jong ki.
