Shillong, Naitung 05
Ka United Democratic Party (UDP), ha ka Sngi Saitjaiñ ka 4 tarik u Naitung 2026, ka la pynlong ïa ka jingïalang pynithuh paidbah ïa u kyrtong MP sha ka ilekshon shiteng samoi jong ka Lok Sabha, u Bah Vivanstone G Kharngapkynta, ha BIDS Hall, Nongthymmai.
Ha kane ka jingïalang la ïadonlang u President ka UDP, u Bah Metbah Lyngdoh, u General Secretary, u Bah Titostarwell Chyne, u Vice President, u Bah Allantry Lyngdoh, u MLA ka Shella, u Bah Balajiedkupar Synrem, u MLA ka Mawsynram, u Bah Ollan Sing Suiñ, ryngkat ki nongkitkam bad ki dkhot ka party.
Haba ai jingkren, u General Secretary ka UDP, u la ong ba ka jingïalap ilekshon mynta ka la kylla long kaba dap da ka jingïakdew kti bad jingkynnoh para party, hynrei ka duna pat ka jingïatai halor ki mat kiba kongsan bad kiba ktah ïa ka Jylla.
Na ka liang u Bah Metbah Lyngdoh, u la ong ba kane ka ilekshon ka long kaba kyrpang bad u la kyntu ïa ki paidbah ba kin pyrkhat sani bha haba ki jied ïa u nongmihkhmat, ym ban shah ïalam bakla da ka jingshongshit.
Shuh-shuh u la ong ruh ba ka jingïoh rung sha Lok Sabha kam dei tang ban kren, hynrei ka dei ka bynta ban ïatai bad ban ïakhun da ki aiñ, ki kanun na ka bynta ka bha ka miat jong ki paidbah bad kumta ka UDP ka don ka jingkyrmen kaba skhem ha u Bah Vivanstone.
U Bah Vivanstone haba kren ha katei ka sngi kum u Kyrtong u la ong ba kiwei ki party ki la dep ïoh ïa ka lad ban mihkhmat sha Lok Sabha, kumta u kyrmen ba mynta ka la dei sa ka pali jong ka UDP ban shakri ïa ki paidbah.
Nalor kata u Bah Vivan u la ong ruh ba ka rukom synshar jong kino-kino ki party kiba don ha ka Sorkar Pdeng ka lah ban wanrah ïa ki jingma ïa ka Jylla bad ïa ka jaidbynriew, khamtam haba ïadei bad ki marpoh khyndew.
U la pynskhem ba lada ki paidbah kin jied ïa u kum u MP, un ïakhun tyngeh bad wat ban aiti ïa la ka jingim lada donkam, ban ïada ïa ka hok jong ka Jylla bad ban ym ailad ïa ka Sorkar India ban mushlia ne tuklar ïa ki marpoh khyndew jong ka Jylla.
