Tura, Naitung 05
Kum ka dak jong ka jingleh burom ïa ka pateng ba la synñiang bad iehnoh shadien da u Bishop George Mamalassery (Bam Kwai ha Dwar U Blei), u Myntri ka tnad Public Health Engineering (PHE), u Marcuise N. Marak, ha ka Sngi Saitjaiñ u la pynbna paidbah ïa ka lynter surok naduh Lad Walbakgre shaduh Holy Cross Hospital kum ka “Bishop George Mamalassery Road.”
Ïa kane ka jingpynbna, la pynbna ha ka jingïalang kaba la long ha Ïingmane jong ka St. Luke, Walbakgre, Tura kum ka jingkynmaw burom ïa ka lyngkhuh sngi ïap ba 2 snem jong u Bishop barim ka Tura Diocese.
Ha kane ka prokram la wan ïashim bynta da u Bishop Andrew R. Marak, Bishop ka Tura Diocese; Auxiliary Bishop Jose Chirackal; ki ophisar Sorkar, ki Lyngdoh, ki nongshah khot sngewbha bad bun bah ki paid ‘riewngeit ka Balang.
Kum shi bynta jong kane ka prokram kynmaw burom, u Bishop Andrew R. Marak u la plie ïa u mot-dur bad ka jingthoh sah kynmaw jong u Bishop George Mamalassery, kaba ai burom ïa ka jingaiti lut jong u baroh shi jingim na ka bynta ka roi ka par ba kynja mynsiem, ka pule-puthi, ka imlang-sahlang bad ka koit ka khiah jong ka Ri-lum Garo.
Kane ka jingpynbna ïa ka surok ka long hadien ba u Marak u la pynbna kyrteng pura ïa ka lynter surok naduh Lad Walbakgre shaduh Holy Cross Hospital kum ka Bishop George Mamalassery Road, da kaba ithuh ïa ki jingnoh synñiang ba da ki phew snem jong une u Bishop ba la khlad noh sha ki paidbah jong ka thaiñ.
Haba ai jingkren sha ki paidbah hadien ka Mass Bakhuid, u Myntri, u Marcuise Marak u la pynkynmaw ïa ki jingnoh synñiang kiba khraw jong u Bishop George Mamalassery wat hapdeng kiba bun ki jingeh ha ka por jong u.
U la ong ba une u Bishop ba la khlad noh u la aiti 28 snem ka jingshakri kaba long ka nuksa ïa ka Tura Diocese, da kaba iehnoh ïa ka dak ka bym lah shuh ban pyndam ym tang ha ka jingim ba kynja mynsiem jong ki paidbah hynrei wat ha ka liang ka pule-puthi, ka koit ka khiah bad ka imlang-sahlang.
U Myntri u la kdew ba ka jinglong nongïalam ba ïohi jngai jngai jong u Bishop Mamalassery ka la pynkylla ïa kiba bun ki jingim ha kylleng ka Ri-lum Garo lyngba ki sienjam pynroi bapher-bapher bad ki shlem treikam ba la seng hapoh ka jingïalam jong u.
Haba pynpaw ka jingsngewnguh ïa ka jingshakri ba kordor jong u Bishop sha ka imlang-sahlang, u Myntri u la kyntu ïa baroh ban bud nuksa ïa ka jinglong ba sngewrit, ka jingshakri bad ka jingaiti lut jong u sha ka longbriew-manbriew.
Ha kane ka prokram, u Auxiliary Bishop Jose Chirackal u la pyntip shaphang ka skhim Bishop Mama Memorial Scholarship, ka ‘Charitable Trust’ kaba la thmu da une u Bishop ba la khlad noh.
Ha kajuh ka por, u la pynbna paidbah ïa ki nongïoh ïa ka Bishop Mama’s Charitable Trust Scholarship na ka bynta u snem 2026, kaba bteng ïa ka jingthmu jong u Bishop ban kyrshan ïa ki samla kiba dei hok lyngba ka pule-puthi.
Lah ban kdew hangne ba u Bishop George Mamalassery (Bam Kwai ha Dwar U Blei) u la don ïa ka bynta kaba kongsan ha ka ban pynwandur ïa ka pule-puthi, ka koit ka khiah bad ki jingtei ha ka imlang-sahlang jong ka Ri-lum Garo.
Hapoh ka jingïalam jong u, la seng ïa bun tylli ki jaka pule, kynthup ïa ki skul, ki ‘Hostel’, ki kolej, ki jaka sumar nongkyndong, ka Holy Cross Hospital, ka Rino Simonetti School of Nursing, Montfort Centre for Education of the Physically Challenged, bad ka Diocesan Social Service Centre (Bakdil), nalor kiwei.
U Bishop Mamalassery u la sdang ïa ka kam Lyngdoh jong u da kaba shakri kum u Assistant Parish Priest ha Tura, Dalu bad Baghmara haduh shiphew snem hashuwa ban shah thung kum u Parish Priest jong ka Dalu ha u snem 1970.
Ha ka 8 Rymphang, 1979, ka ‘Holy See’ ka la thung ïa u Fr. George Mamalassery kum u Bishop banyngkong jong ka Tura Diocese, bad la pynkyntang Bishop ïa u ha ka 18 tarik Lber, 1979 ha Madan ïalehkai jong ka skul Don Bosco, Tura.
