Shillong, Naitung 05
Ka Khun Hynniewtrep National Awakening Movement (KHNAM) ka la phah da ka jingthoh sha ka Central Pollution Control Board (CPCB) ban kyntu ïa ka Board ban leit jurip bad ban wad ïa ka jingshisha halor ka mat kaba ïadei bad ka jingjaboh ka lyer ha Byrnihat, Meghalaya.
Haba kren sha ki nongthoh khubor u Working President ka KHNAM u Bah Thomas Passah u la ïathuh ba ka jingphah jingthoh sha ka CPCB ka long ban pynpaw ïa ka jingsngewkhia halor ka jingjaboh ka lyer ha Byrnihat ba la kynnoh la pynmih da ka karkhana shna kyiad kaba la tip ka M/s Umiam Distillation Private Limited, kaba don ha Industrial Area ha Byrnihat.
U la ong ba, kane ka la paw pyrthei hadien ba la saphriang kawei ka durkhih (video) ha ki rynsan paidbah (Social Media) bad ka seng ka la pynpaw ba kum kine ki mat ka dei kaba buh jingma ïa ka koit ka khiah ki paidbah bad ban jur ba donkam ïa ka jingpynbeit ba mardor, kataba ka Meghalaya State Pollution Control Board (MSPCB) bad ka karkhana ki la kyntait ïa kane, u la pynpaw ruh ba ka KHANM ka kyntait ïa ka kaiphot ba la pynmih da ka MSPCB.
Ka KHNAM ka la kdew ba ka MSPCB ka dei kaba don hapoh ka jingpynïaid bad ka jingsynshar jong ka Sorkar Jylla, namar kata kino-kino ki jingkam kiba ka Board ka pynmih ka KHNAM ka la kynnoh ba ym lah ban shaniah pura namarba kam long ka bym khuid.
Namar kata, ka KHNAM ka la kyntu ïa ka CPCB ba kan shim hi ïa ka sienjam ban pynlong ïa ka jingjurip bad tohkit ïa ka lyer ha baroh kawei ka thaiñ ha Byrnihat, ryngkat bad ka jingkhmih bniah ïa ka karkhana M/s Umiam Distillation Private Limited, khnang ban pynshisha ba ka koit ka khiah ki nongshong shnong ka thaiñ kan ym shah ktah.
U Bah Thomas u la ong ba ka jingeh halor ka jingjaboh ka Mariang ka la paw pyrthei lyngba kawei ka durkhih kaba la saphriang kylleng kaba la kylla long ka mat ba la ïatip paidbah, kaba pynlong ïa ka Jylla ban shah ktah ha ka kam jngohkai pyrthei kumta kane ka mat ka dei kaba ymlah ban shu sngap jar.
Nalor kata haba bynrap u la ong ba ka Sorkar India ruh ka la pynmih ïa kawei ka kaiphot halor kane ka jingjaboh ka lyer ha Byrnihat bad kaba khlem da kdew tang ïa kawei ka karkhana, ka kaiphot Sorkar ka la kdew ba ka Byrnihat ka dei ka jaka kaba jaboh tam ka lyer ha baroh kawei ka thaiñ Shatei Lam-mihngi, Kane ka jingbna na ka Sorkar Pdeng ka kdew ïa ka jingshisha.
U la ong ruh ba ka KHNAM kan ym lah ban pdiang ïa ka jingkam ka MSPCB bad la kynnoh ba ki lah ban ïatreilang ryngkat ki kompeni kiba pynjot ïa ka Mariang, na kata ka daw ba ka KHNAM kam shaniah ïa ka kaiphot ka MSPCB bad kaba la pynlong ïa ka ban buh jingujor sha ka CPCB ban ïoh ïa ka jingshisha.
