Nongstoiñ, Naitung 05
Na ka bynta ka koit ka khiah jong u paidbah, ka tnad ka koit ka khiah jong ka West Khasi Hills bad Eastern West Khasi Hills, ka kyntu ïa baroh ki nongshong shnong ban long kiba husiar bha ha ka por ba leit kheit bad bam ïa ki tit khlaw.
Ha ka kyrwoh khubor ba la phah na ka liang ka tnad ka koit ka khiah kala pynpaw ba ha kine ki sngi la ïohi ba ka jingpang na ka jingbam tit khlaw ka la nangkiew ha baroh ar tylli ki District, bad don kiba la shitom jur haduh ban poi sha ka jaka sumar ha hospital.
Shuh shuh ka tnad ka koit ka khiah kala ong ruh ba ki jingtip kiba kongsan ban kynmaw, ki long ba bun ki tit ba don bih ki ïasyriem bha bad ki tit kiba lah ban bam, bad ym lah ban ithuh da kaba peit ne mad.
Ka tnad ka koit ka khiah kala pynpaw ruh ba ka jingshet, pynrkhiang, lane da kaba ber kino kino ki jingber kam lah satia ban pynduh ïa ka bih jong u tit ba sniew.
Na ka liang ka tnad jong kine ki ar tylli ki District, ha ka kyrwoh khubor kala pynpaw ruh ba ki dak ki shin kiba dei ban leh ki long, bam tang ïa ki tit ba thied na ïew kiba shaniah lane ïa kiba la pynthikna da ki nongwad bniah ba ki long kiba biang.
Shuh shuh sait khuid bha ïa ki kti da ka sabon hadien ba ktah ïa ki tit khlaw, leit mar-mar sha ki doktor lada don ba shitom hadien ba bam tit – wat ju ap, kumjuh ruh, buh ïa ki dak jong u tit ba sah, ki jingbam ba la shet, bad rah sha hospital khnang ban ïarap ïa ki doktor ban peit bniah.
Ka tnad ka koit ka khiah jong kine ki ar District kala kyntu ruh ba pyntip sha ki bahaïing hasem bad ki marjan shaphang ka jingma na kaba bam ïa ki tit khlaw bym ithuh.
Nangta, ka kyrwoh khubor ka ong ruh ba ki dak ki shin kiba ym dei ban leh, ki long wat ju kheit lane bam ïa ki tit khlaw lymda phi tip shai bha ba ki long kiba dei ban bam.
Shuh shuh wat ju shaniah ha ki jingïathuhkhana ha ki rukom tynrai lane ki jingpynshisha tynrai ba ki tit khlaw ki long kiba bha ban bam, wat pyrkhat ba ki tit ba phi ju bam ha ki snem ba la leit kin long kiba biang barabor, ka bor bih ka ïapher na uwei u tit sha uwei pat.
Ka kyrwoh khubor ka ong ruh ba wat ap ïa ki dak ban nang jur shuwa ba phah sumar, nangta ka jingbam tit ba sniew ka lah ban pynïap hapoh khyndiat kynta, bad ym tang katta la kyntu ruh ba wat pyndonkam ïa ki dawai khlem da thoh ki doktor namar kane ka pynslem ïa ka jingsumar ba lah ban pynkoit kham kloi.
Na ka liang ka tnad ka koit ka khiah, kala pynpaw ruh ba ki dak jong ka jingbam tit ba sniew, bad ki dak ki lah ban mih hapoh 30 minit haduh bun kynta hadien ba bam, bad ki jingpang kiba lah ban ïohi ki kynthup, kum ka jingkthang ka shyntur, prie bad pynhiar bunsien, ka jingbym ïohi bha ki khmat, bad kiwei kiwei ruh ki dak ki shin.
Ka tnad ka koit ka khiah, ha ka kyrwoh khubor kala batai ruh ha kaba ïadei kumno ban leh lada suba bala bam tit sniew, dei ban ïalam mar-mar ïa u lane ka nongpang sha ka PHC, CHC, lane District Hospital ba jan tam.
Shuh shuh la ong ruh ba ka jingsumar kaba kloi ka lah ban pynim, lada lah, rah lang ïa u tit ba sah lane ka jingbam ban ïarap ïa ki doktor ban pynshisha ïa kane ka jingpang.
Ka tnad ka koit ka khiah ka kyrpad ïa baroh ki Sordar, Rangbah Shnong, ki nongïalam shnong, ki nongïalam Balang, ki bor pynïaid shnong, ki skul, ki ASHA bad ki paidbah ban pynsaphriang ïa kane ka jingmaham khnang ban lait na ka jingïap kaba lah ban teh lakam.
