New Delhi, Naitung 05
U Myntri Rangbah ka Jylla, Conrad K Sangma, u la leit ïakynduh ïa u Myntri Kam Pohïing ka Ri, u Amit Shah ha New Delhi ha ka sngi U Blei. Ïa u Myntri Rangbah la synran da ka kynhun ki nongïalam Balang na ka Jylla.
Kane ka kynhun ka kynthup ïa ki nongmihkhmat na ka Presbyterian Church of India (PCI), ka North East India Christian Council (NEICC), ka Catholic Church (Archdiocese of Shillong) bad ka Garo Baptist Convention. Ka kynthup ïa u Rev. H. L. Myrsing, Moderator, PCI;Rev. S. C. Diengngan, Chairman, FCRA Sub-Committee, PCI; Rev. Dr. Meyu Changkiri, General Secretary, NEICC; Fr. Teiboklang Kharbani, Administrator, Archdiocese of Shillong; bad u Durasal R. Marak, Youth Director, Garo Baptist Convention, nalor kiwei kiwei.
Ha ka jingïakynduh, ka kynhun kala pyntip sha u Myntri Kam Pohïing ka ri ïa ki jingsngewkhia jong ka Jylla ba ïadei bad ki katto katne ki kyndon jong ka Foreign Contribution (Regulation) Act (FCRA), kynthup ka jingtyrwa pynkylla (amendment) ïa kane ka ain, bad ka jingktah jong ki ïa ka jingtreikam ki Balang, ki jaka pule, ki jaka leh synei bad jaka ai jingïarap ïa ka imlang sahlang ha Meghalaya.
Kine ki Institution ki pynïaid ïa bun tylli ki skul, ki hospital bad ki prokram ban shakri ïa ka imlang sahlang kaba la ai ka jingshakri ïa ki paidbah ha kylleng ka Jylla, khamtam ha ki jaka nongkyndong.
U Myntri Rangbah u la pynpaw ïa ki bynta ba kongsan bala leh da kine ki Institution ha ka imlang sahlang bad ka kam pule dangle hapoh ka Jylla, bad kyntu ïa ka Sorkar Pdeng ban shimkhia ïa ka jinglong jingman ba kyrpang jong ka Meghalaya haba khmih ïa ki kam ba ïadei bad ka FCRA.
U la kyntu ïa ka Sorkar Pdeng ba kan pyrkhat lem ha kaban pynthikna ba ki Institution ba shisha kiba trei ha ka kam shakri ïa u paidbah kin ïai bteng ban trei ïa ki kam khlem kano kano ka jingpynthut.
