Shillong, Naitung 05
Namar ka jingbym don shuh ka jingïohnong na ka kam rep Synsar ba la hiar palat ka dor ha ka ïew ïadie ïathied, ki nongrep ki dap da ka jinglynga pisa bad wad ki lad ki lynti ban pynpher noh ïa ka kam rep kaba kham biang bad lehse ka ban lah ban kyrshan pyndap pynbiang ïa ki jingdonkam haïing hasem.
Ka Shnong Rasong kaba hap hapoh ka Mawkynrew Community and Rural Development (C&RD) Block da ka jinglam lynti u Bah D. Nongkynrih u ba dei u nongshong shnong katei ka Shnong ka la shim ïa ka sienjam ban shim ki lad ai jinghikai ha ka rukom ban thung ïa uwei na ki jait jingthung uba lehse u dang long uba kham thymmai ban tip ïa kiba bun bad uta u dei u ‘Black Cardamom’.
Ha ka Sngi Saitjaiñ u MLA ka Mawkynrew Constituency u Bah Banteidor Lyngdoh ha ka jingdon ryngkat u Bah Afu N. Y. Jana uba long u Director ka YoCa Spices, u la sam palat 5000 tylli ki tynrai ‘Black Cardamom’ sha ki 23 tylli ki longïing nongrep jong ka Shnong Rasong bad ïa ka jinglut jingsep haba ïadei ki symbai la pynlut hi da u MLA.
U Bah Banteidor haba ai jingkren ha ka jingïalang ba la long ha khmat lum Rasong, u la pynpaw ka jingsngewkhia haba ka ïew ïadie ïathied synsar ka hiar ba ki longïing kiba im da ka kam rep synsar ki mad ïa ki jingeh bad ka la wan ka jingmut jingpyrkhat kumno ban ïarap ïa ki nongrep. “Kane ka jingpyrshang ban rep ïa une u jait jingthung ha ka thaiñ, lehse kan lah ban kyrshan ïa ki longïing longsem jong ki nongrep” la ong u Bah Banteidor.
Shuh-shuh u la ai mynsiem ïa ki nongrep bad ïa ka Shnong Rasong baroh kawei ba kin pynjanai ïa ka kam kumjuh ban shim ïa ki jinghikai ba ka YoCa Spices kan sa btin lynti bad kyrmen ba ha kawei ka sngi kan long ka jingsarong ïa ka Shnong namar ka ïew ban shalan ïa u ‘Black Cardamom’ kan ym dei tang ha ka Ri, hynrei wat ha kiwei pat ki Ri ba kynthup ïa ka Indonesia, Malaysia, Singapore bad kiwei.
Haba kren na ka liang u Bah Afu u la ong ba ka jinglong ka khyndew ha ka shnong Rasong ka ïahap bha ïa u ‘Black Cardamom’ ban san kloi bad ban sei ki soh ba bha, namar une u jait jingthung u ïahap bha ha ki jaka ba long sharing bad ba long dymmiew.
Shuh-shuh u la ong haba ïadei ka jingpynïaid ïew ïa u mar kan ïarap hi ka YoCa Spices, ka dor ban die ïa u ‘Black Cardamom’ kan long ha ka dor 800 shi kilo bad kane kan long ka jingmyntoi ïa ki nongrep ha kajuh ka por ka rukom rep ruh ka long kaba kham suk ban ïanujor ka rukom rep Synsar.
