Shillong, Naitung 05
Kum shi bynta jong ka Special Intensive Revision (SIR), palat 1.67 lak tylli ki ‘Enumeration Form’ la dep ban sam sha ki longïing ha kylleng ka East Khasi Hills District.
“Baroh ki don 1,67,253 tylli ki ‘Enumeration Form’ kiba la sam sha ki nongthep ‘vote’ ha kylleng ki 15 tylli ki ‘Assembly Constituency’ ha ka distrik haduh ka 5 tarik Naitung, 2026,” ong ka District Election Office (DEO) ha ka Sngi U Blei.
Kane ka sienjam ka la sdang ha ka 30 tarik Jylliew bad ka kynthup ïa baroh 898 tylli ki bynta jong East Khasi Hills.
Ki Booth Level Officer (BLO) ïa mynta ki dang ïaid sha man la ki thlew ïing ban sam ïa ki phom bad ban shim ïa ki hadien ba la dep ban pyndap.
Ïa kane ka jingtreikam baroh kawei la buh ban pyndep ha ka 29 tarik u Naitung, 2026.
Ka Pynursla (ST) kaba bun eh ka jingsam phom, ka la poi haduh 22,004 tylli, bud sa ka Mawlai (ST) – 13,533 tylli bad ka Pynthorumkhrah (GEN) – 12,683 tylli.
Ka Sohïong (ST) ka la sam ïa 12,521 tylli ki phom, katba ka Nongkrem (ST) bad ka South Shillong (GEN) ki la tam ïa ka 10 hajar – kata 10,012 tylli bad 10,049 tylli ki phom.
Haba phai sha ki jaka sor jong ka Shillong, ka West Shillong (GEN) ka la sakhi ïa ka jingsam ïa 9,574 tylli ki phom, ka Nongthymmai (ST) – 9,679 tylli, ka North Shillong (ST) – 9,197 tylli, ka Mylliem (ST) – 8,892 tylli, ka Mawrynkneng (ST) – 11,940 tylli, ka Mawphlang (ST) – 9,995 tylli, Mawkyrwat (ST) – 8,791 tylli, Mawsynram (ST) – 10,463 tylli, bad East Shillong (ST) – 7,920 tylli.
Halor ki lad ‘Digital’, la pynrung haduh 6,707 tylli ki phom haduh mynta. Ka Mawphlang (ST) ka lamkhmat da 1,051 tylli ki phom (digital), bud sa ka Nongthymmai (ST) da 882 tylli bad ka Mawsynram (ST) da 870 tylli.
Ka DEO ka la ïathuh ruh ba ka SIR ‘Helpline’ jong ka, ka la ïoh pdiang 17 tylli ki ‘call’ haduh ka 5 tarik u Naitung, bad baroh ki mat ba la pynsngew, la lah ban pynbeit ïa ki.
Na ka liang ki ophisar Sorkar ki la kyntu ïa ki nongshong shnong ban ïatreilang bad ki BLO ha ka por ba ki wan mih sha ïing bad ban aiti ïa ki phorm ba la pyndap ha ka por kaba biang ban pyntikna ïa ka jingpynthymmai jong ka thup kyrteng ki nongthep ‘vote’ na ka bynta ka distrik.
