Shillong, Naitung 05
Ki nongshong shnong ka Laitduh kaba hap ha Hima Sohra ki la pynpaw ka jingsngew diaw haba u Sub Divisional Magistrate ka Sohra Civil Sub Division u Bah Mark A Challam, MCS u la pynmih ïa ka hukum ban ym shah ban ïalum briew palat 5 ngut ha Weisawdong bad ïa ki lynti ïaid ki ban poi sha katei ka kshaid.
Kane ka jingpynmih hukum ka dei hadien ba la ïoh jingtip ba u Sordar bad u Secretary ka Umblai ki la thmu ban lum lang ïa ki nongshong shnong ban tih jaka ïaid thymmai ne ban pynbha ïa ka lynti ïaid kaba rim na Arliang Riat ban poi sha Weisawdong.
Kane ka lah ban lam sha ka jingïaleh pyrshah hapdeng ki nongshong shnong ka Umblai bad ki nongshong shnong ka Laitduh.
Haba ïakren bad u Bah Lovingstar Kharshandi uba dei u dkhot ka Executive Committee ka shnong Laitduh u la ïathuh ba ka jingkhang ïa ka jaka rung ban leit sha Weisawdong ka long ka jingduhnong ïa ki nongshong shnong Laitduh namar ki la im jakpoh na kaba kamai na ka jingwan ki nongjngohkai pyrthei.
U Bah Loving u la ïathuh ba ka shnong Umblai ka la mut shna lynti thymmai najan jaka ïeng kali jong ka Umblai kaba don harum ka jaka lum bai rung ka shnong Laitduh.
U la ïathuh ba ka shnong Laitduh kam shah ïa kane ka lynti thymmai namar ki mut ban pynpoi sha ka lynti ba shna ka Laitduh.
Shuh shuh u la pyntip ba kiba bun ki nongjngohkai pyrthei kiba la wan poi ki la leit phai noh namar ki don ki pulit ha katei ka jaka.
Kumban shu kdew katkum ka hukum ba la pynmih da u SDO Civil Sohra la pynpaw ba kane ka jingïakajia kine ki ar tylli ki shnong ka la bteng biang hadien ba ka Khasi Hills Autonomous District Council ka la aiti ha ka shnong Laitduh ban peit ïa ka Weisawdong, na ka jingdon bun kiba pyrshah ki ar liang ki la rai ban kheiñ ïa kata kum ka jingpynbeit ba shipor khnang ban wanrah ka jingïasuk, ban kyntiew ïa ka kam jngohkai bad ban ai jingmyntoi ïa ka kamai kajih.
Yn ym shah ban rah ïa ki dieng ne ki nar ne ki wait bad ki tiar ïaleh ha katei ka jaka bad yn ym shah shuh ban leit kai ha katei ka jaka wat ïa ki nongjngohkai pyrthei ruh kumjuh.
Kino kino kiba pynkheiñ ïa kane ka hukum kin shah pynshitom katkum ka Section 223 jong ka Bharatiya Nyaya Sanhita, 2023. Kane ka hukum kan treikam haduh ban da pynmih pat da kawei ka hukum.
