Shillong, Naitung 05
Ka jingjur jong ki kam tuh kam thiem kam dei shuh tang ïa ki arshaka, ne ka jingprong tuh ïa ki ïing ki dukan ne kiwei ki kam tuh, hynrei ki runar kim salai shuh wat ban prong tuh hapoh ki ïingmane bad ban tuh naphang katba ki ïoh.
Katkum ka khubor kaba la ïoh na ki pulit la ong ba u Pastor T.J Moksha u la ai ka jingujor ba ha ka 30 tarik jong u bnai ba la lah, kata ha ka por shiteng synnia eiei, ki runar bym lah ban ithuh, ki la prong tuh ha phyllaw jong ka ïingmane Christ Tabernacle Church kaba don ha Jaiaw Lumbatemon, Shillong bad ban tuh ïa ki tiar tem kiba shongdor haduh kumba T.1 lak eiei.
Ha kawei pat ka khubor, na ka liang jong ki pulit ki la ïoh ka jingpyntip ba ha ka 2 tarik mynta u bnai, ki runar bym lah ban tip ki dei kiei, ki la prong tuh hapoh ka phyllaw jong ka ïingmane ka Balang Presbyterian Mawtawar, Umjalynshir (East Khasi Hills) bad ha kaba ki la tuh ïa ka duli (almirah), ka Bible, khiew syntiew, ki kot jingrwai bad kiwei kiwei ki tiar.
