Shillong, Naitung 05
U Samla Raymond Kharjana, President ka Khasi Students Union (KSU) Sengkmie u la pyntip ba ha ka jingïakynduh ba dangshen jong ka seng bad u Myntri Rangbah ka Jylla, u Conrad K Sangma, ba ka jingkular na ka Sorkar ka long ban nym ailad ban tih Uranium, hynrei la ïoh jingtip pat katkum ka jingïoh lum ka seng, ba ka Sorkar ka thmu ban leh lyndet bad ban thok ïa ki paradoh parasnam.
“Ka seng hi kan nym kynran dien halor kane ka mat pyrshah tih Uranium, wat lada hap ban aiti ïa la ka jingim,” la ong u Samla Raymond haba kren sha ki lad pathai khubor ha ka sngi ba hiar sha Domiasiat, ban kynduh ïa kiba ha ïing hasem jong i Meiieid Spility Lyngdoh Langrin (bam kwai ha dwar U Blei) bad ki nongshong shnong katei ka jaka.
U Samla Raymond u la ong ba hadien ba la ïoh sngew ïa ki khana halor ka jingthmu ka Sorkar lyngba da kaba phah ïa ki briew jong ki sha kitei ki thaiñ, ban pynbiej bad ban thied ïa ki paradoh parasnam ban ai noh ïa ka jingtih Uranium.
“Ha ka jingïakynduh bad u Myntri Rangbah ka Jylla, u la kren da kaba shai ba ka Sorkar Jylla ruh kan nym shah ban ailad ban khlong ïa u Uranium, hynrei haba phai pat sha ki khana ka long thamula, bad kane ka pyni shai ba ka Sorkar Jylla jong ngi, ka don hi ïa ka jingthmu ban khlong ïa u Uranium,” u la ong.
Da kaba bynrap ba kum ka seng, ngin nym ailad bad pyrshah horkit hordang ban tih Uranium na kane ka thaiñ.
“Hooid, ha ka jingïaid lynti ka seng, ngi ju ïohi na ka por sha ka por, ba ki sdang ban pynkhih im biang ïa kino kino ki jait ki mat haba wan kano-kano ka body ba thymmai, hynrei ka khubor kaba shai hi ka long ba watla ki nongïalam ka seng kidei kiba dang thymmai, ki mat pat kidei kijuh. Wat ngi dei kiba tlot ha ka jingbun paid, hynrei ka seng ka shim ïa ka rai rangbah ban nym ailad ban tih ïa une u marpoh khyndew,” la ong u samla Raymond.
U Samla Raymond u la pyntip ruh, ba ka seng ka ïoh jingtip ba ka la don ka jingbyrngem ïa ki paidbah kiba don ha syndah bad ka KSU, kiba ïeng ban pyrshah ïa ka jingthmu tih Uranium ha ka thaiñ. “Ngin don syndah beit bad ki paradoh parasnam haduh kaba kut jong kane ka mat tih Uranium,” u la ong.
Na ka liang u Samla Reuben Najiar, General Secretary ka KSU u la dawa ba ka Sorkar Jylla bad ki 60 ngut ki MLA ki dei ban pass mardor da ka resolution, ban khang mardor ïa ka jingtih Uranium hapoh ka Jylla.
Shuh shuh u la ong ruh ba baroh ki 3 tylli ki Distrcit Council, kiba kynthup ïa ka Khasi Hills Autonomous District Council (KHADC), Jaiñtia Hills Autonomous District Council (JHADC) bad Garo Hills Autonomous District Council (GHADC), ba kidei ban wanrah syndon da ka aiñ kiba pyrkhing, ban khang ïa ka jingtih Uranium namar une u marpoh khyndew um dei uba don tang ha South West Khasi Hills, hynrei wat ha Jaiñtia Hills bad Garo Hills.
