Nongpoh, Naitung 06
Kum shi bynta ban wad ki lad ki lynti ban weng ïa ka jingeh jong ki paidbah ha kaba ïadei bad ka jingjaboh ka lyer kaba la ktah jur ïa ki paidbah nongshong shnong ka thaiñ Byrnihat, u MLA ka Jirang bad Myntri ka Sorkar Jylla, Bah Sosthenes Sohtun ha ka sngi Nyngkong u la pynlong ïa ka jingïalang kaba kyrpang ban bishar bniah ïa ki sienjam kiba lah ban shim ban pynduna ïa ka jingjaboh bad ban ïada ïa ka koit ka khiah jong ki paidbah.
Ïa kane ka jingïalang la pynlong ha MeECL Inspection Bungalow, Byrnihat, ha kaba la donlang u Chairman ka Meghalaya State Pollution Control Board (MSPCB), u R Nainamalai, u Deputy Commissioner ka Ri Bhoi, Dr Abhishek Saini, u Superintendent of Police ka Ri Bhoi, Giri Prasad, ki ophisar na ka PWD bad MIDC, ki nongmihkhmat jong ki karkhana kiba don ha Meghalaya, ryngkat bad ka Synjuk ki Rangbah Shnong bad ki nongïalam shnong na ka thaiñ Byrnihat.
Ha kane ka jingïalang, ki ophisar na ka MSPCB bad ki nongmihkhmat jong ki karkhana ki la pyni paidbah lyngba ki dur halor ka jinglong jingman jong ka lyer ha Byrnihat bad ki sienjam kiba la shim ban pynduna ïa ka jingjaboh ka lyer. Ki la pynpaw ruh ba don katto katne ki kynhun lad pathai khubor kiba la pynmih khubor da kaba pynpaw ba Byrnihat ka dei ka jaka kaba jaboh tam ka lyer ha ka pyrthei khlem da pynshong nongrim ïa ki jingshisha kiba pura.
Na ka liang ki nongïalam shnong ka thaiñ Byrnihat pat, ki la pynpaw ïa ka jingsngewkhia halor ka jingktah kaba jur jong ka jingjaboh ka tdem jaboh bad ka lyer sma iwtung ïa ki paidbah. Ki la kynnoh ba ki lyer ba mih na ki karkhana ki la ktah ïa ka koit ka khiah jong ki nongshong shnong, kaba la pynkiew ïa ka jingdon jong kiba pang cancer, tuberculosis (TB) bad kiwei pat ki jingpang kiba ïadei bad ka jingring mynsiem. Ki la pynpaw ruh ïa ka jingeh na ka lyer kaba sma iwtung bad dawa ban buh noh ïa ka Regional Office lane ka shnat treikam ba pura jong ka Meghalaya State Pollution Control Board ha Byrnihat khnang ba yn lah ban leh mar mar ïa ka jingtohkit haba mih kino-kino ki jingujor halor ka jingjaboh ka lyer.
Kawei na ki rai kiba kongsan tam ba la mih na kane ka jingïalang ka long ban thaw ïa ka komiti kaba kyrpang kaba kynthup ïa ki nongmihkhmat ka MSPCB bad ki nongïalam shnong ban wad ïa ki daw tynrai jong ka jingmih ki lyer jaboh bad kiba sma iwtung. Lyngba kane ka komiti, ki paidbah kin lah ban phah beit ïa ki jingujor da kaba ai ïa ki dur bad durkhih lane kiwei pat ki sakhi satar ban pynthikna ïa ka tynrai jong ka jingmih ki lyer jaboh.
Haba kren hadien ka jingïalang, u Bah Sosthenes u la ong ba ka jingthmu jong kane ka jingïalang ka long ban wad ïa ki lad ki lynti kiba lah ban pynduna ïa ka jingjaboh ka lyer bad ban shim ïa ki sienjam kiba paka ha kaba ïadei bad ka jingsngewkhia jong ki paidbah halor ka jingshah ktah ha ka koit ka khiah. U la ong ba ka Sorkar ka angnud ban lap ïa ka daw tynrai jong ka jingmih ki lyer jaboh bad kiba sma iwtung bad ban pyntreikam ïa ki sienjam kiba donkam ban pynbeit ïa kane ka jingeh.
U la ong ba ka MSPCB ka dei ban shimkhia mardor da kaba pynlong ïa ka jingtohkit kaba bniah halor ka jingmih ki lyer jaboh bad kiba sma iwtung bad ban shim ïa ki sienjam kiba tyngeh pyrshah ïa kino-kino ki karkhana kiba pynkheiñ ïa ki kyndon jingïada ïa ka mariang lane kiba pynmih jaboh kiba ktah ïa ki paidbah nongshong shnong ka thaiñ.
Haba jubab ïa ka jingdawa ban buh noh ïa ka shnat treikam ba pura jong ka Pollution Control Board ha Byrnihat, u Bah Sosthenes u la ong ba un sa ïakren hi markhmat bad u Myntri Rangbah ka Jylla, Conrad K Sangma, ban shimkhia halor kane ka bynta. U la ong ruh ban lah weng ïa kane ka jingeh, ka donkam ka jingïatreilang kaba jan hapdeng ka Jylla Meghalaya bad Assam namar ba bun na ki karkhana kiba don ha katei ka thaiñ khappud ki hap ha ki ar Jylla.
U la bynrap ba ka komiti kaba thymmai ka ban kynthup ïa ka MSPCB bad ki nongïalam shnong kan long ka lad ban pynsuk ïa ka jingïoh ujor jong ki paidbah. Lada lap ïa kano-kano ka karkhana kaba pynmih jaboh pyrshah ïa ki kyndon aiñ, yn lah ban shim ïa ki sienjam kiba donkam katkum ki sakhi satar ba la ai da ki paidbah, katba ki bor ba dei peit kin ïatreilang ban lap bad weng ïa ki daw tynrai jong ka jingjaboh kaba la ktah jur ïa ka thaiñ Byrnihat.
