Shillong, Naitung 06
Ka Hynñiewtrep Integrated Territorial Organisation (HITO) Mawiong Unit, ha ka 06 tarik u Naitung (July) 2026, hapoh ka jingïalam u Samla Giban Star Marweiñ, General Secretary ka HITO Mawiong Unit, ryngkat bad u Samla Pynshngaiñ Nongrum, Organising Secretary ka HITO Shillong City, ki la hiar sha kawei ka jaka trei ha Mawiong, hadien ba ka la ïoh pdiang ïa ka jingujor na ki paidbah halor ka jingdon jong ki nongbylla bar jylla kiba trei khlem ki kot ki sla kiba biang katkum ka aiñ.
Ha kane ka jingjurip, ka seng ka la lap ba la don shisha ki katto-katne ki nongbylla bar jylla, kiba trei ha katei ka jaka.
Haba ki dkhot ka seng ki la kylli bniah ïa ki, ki la pyntip ba ki wan na Dhubri, Assam, bad ki shong ki sah ha Demseiñiong. Ki la phla ruh ba kim don satia ïa ki kot ki sla kiba biang, kiba pynshisha ïa ka jingwan trei jong ki ha ka Jylla Meghalaya.
Hadien kane, ka HITO Mawiong Unit ka la bthah ïa kitei ki nongbylla, ban mih noh na katei ka jaka bad ka la ai jingmaham kaba tyngeh ïa u kontraktor bad kino-kino ki paidbah kiba wanrah ne pyntrei ïa ki nongbylla bar jylla, ba kin pynthikna ba ki don ïa baroh ki kot ki sla kiba donkam, katkum ka aiñ shuwa ban ai kam ïa ki.
Ka seng ka maham ruh, ba lada kino-kino ki kontraktor ne trai kam, ki dang bteng ban pyntrei ïa ki nongbylla bar jylla khlem ki kot ki sla kiba biang, kin hap ban shim ïa ka jingkitkhlieh pura, lada mih kano-kano ka jingeh ne jingjia hadien habud.
Namarkata, Ka HITO ka kyntu ïa ki paidbah ba kin ïai long kiba peitngor bad ba kin pyntip sha ka seng lane sha ki bor ba dei peit, lada ki lap ïa kino-kino ki jingpynkheiñ aiñ kiba kum kine, khnang ban ïada ïa ka jingshngaiñ, ka hok bad ka bha ka miat jong ki trai ri trai muluk.
