Shillong, Naitung 06
U Symbud Myntri Rangbah ka Jylla ka tnad kam pynroi sor, u Bah Sniawbhalang Dhar ha ka Lah Sngi U Blei u la ong ba ka Sorkar Jylla ka khmih lynti ban poi sha ka rai haba ïadei bad ka jingthmu ban pynkynriah ïa ka Harijan Colony na Them Ïew Mawlong ha kaba kut jong une u bnai.
U Bah Dhar u la ong ba ka dang sah sa kawei ka jingïalang hashuwa ba ka Sorkar kan khmih bniah ïa ki jingtip ba la bsut thymmai.
“Ngi dang thmu ha kaba kut jong une u bnai. Ngi dang hap ban shong sa kawei ka jingïalang bad ngin sa shim ïa ka kaiphod kaba tikna halor kaei kaba don hangta. Kumta lehse, khatduh, ngin sa ïoh ïa ka kaiphod kaba tikna,” u la ong haba kren sha ki nongthoh khubor.
Katkum ka jingong u Bah Dhar, kawei na ki lad ba la ïakren ha ka jingïalang ba la dep ka long ban kyrpad jaka na ka tnad ïada ri na ka bynta ban pynkynriah ïa kiba sah ha Them Ïew Mawlong.
Ka Sorkar mynta ka dang ap ïa ka jingai jingmut na ki heh ophisar ka tnad ïada ri hadien ki jingïakren ba la pynlong ha ki kyrdan bapher-bapher.
“Ngi dang ap ïa ka jingïakren kaba khatduh hapdeng ki heh ophisar bad ka tnad ïada ri. Kumta to ngin kyrmen ba ha kaba kut jong une u bnai, ngan sa lah ban ïasam eiei ha kaba ïadei bad ka jinglong-jingman jong ka ‘Harijan Colony’,” u la ong.
Halor ka jingheh jong ka jaka kaba dang wad, u Bah Dhar u la ong ba ym pat don kano-kano ka jingdawa kaba kyrpang haduh mynta namarba ki jingïakren kiba bniah kim pat sdang ïa mynta.
“Ngim shym la kylli katno. Ngi hap ban ïakren shuwa. Lada ki mon, ngin ong ba donkam katne ka jaka. Ngi la pynithuh 2-3 tylli ki jaka hynrei haduh mynta ngim pat ïohi dak eiei na ka liang ka tnad ïada ri, namarba wat u Myntri Rangbah ka Jylla ruh u la ïakynduh 2-3 sien bad u Myntri kam ïada ri ka Sorkar Pdeng,” u la ong.
“Haduh lano, ngam lah ban ong. To ngin ïakren shuwa, tang hadien kata ngin sa lah ban shim ïa ka rai halor kumno ban ïaid shakhmat,” u la ong.
Haba jubab ïa ki jingkylli halor ka ‘Blueprint’ ba la pynkhreh da ka Jylla na ka bynta katei ka jingpynkynriah, u Bah Dhar u la ong ba kane ka dang don ha ka miej, hynrei ka Sorkar ka dang buh ruh ïa ka jaka jong ka tnad ïada ri kum ka lad kaba kham bha.
“Ka ‘Blueprint’ ka dang neh kumba ka long. Mynta ngi la ïoh sa kawei pat ka lad bad ka tnad ïada ri. Kumta baroh arliang ki long kiba la khreh. Lada ka ‘Plan A’ kam treikam, ngin ïaid da ka ‘Plan B’. Ka Sorkar kan shim ïa ka rai kumno ban ïaid shakhmat,” u la ong.
