Shillong, Naitung 06
U Symbud Myntri Rang-bah ka Jylla Bah Sniawbhalang Dhar ha ka sngi Nyngkong u la ban biang ba ka nongrim jong ka Sorkar Megha-laya halor ka kam tih Uranium ka long kaba shai kdar ba kan nym ailad ne shah ban tih hapoh ka Jylla.
U Bah Sniawbhalang u la ong, ka Sorkar ka ïeng skhem bad u paidbah halor kane ka mat bad kam don satia kano-kano ka jingkylla ha ka nongrim jong ka Sorkar.
“Ngi la long shai kdar halor kane. Ngin ym shah ban tih Uranium. Ka Sorkar Jylla ka ïeng ha ryngkat bad u paidbah ka Jylla. La ka lah ban dei bad u Uranium, ngi la dep ban kren shai ba ngi don ha ryngkat bad u paidbah ka Jylla,” la ong u Symbud Myntri Rang-bah haba kren bad ki lad pathai khubor.
Kane ka jingkynthoh kala mih hadien ki jingkynnoh da ka KSU ba don ki katto katne ki MLA barim kila pyrshang thied jaka ha Domiasiat ha ka dor kaba tad bad pyrshang ban pynkohnguh ïa ki trai shnong ba kin pdiang ïa ka jingtih Uranium.
U Bah Sniawbhalang u la pynpaw ba um don jingtip halor kane ka jingkam, hynrei u la ban jur ba ka jingtih kam lah ban ïaid shakhmat katba ka Jylla baroh kawei kam pat mynjur lang.
“Ngam don jingtip ïa kane. Tang kawei ka long ba ïa ka jingtih Uranium yn nym ailad satia katba ka Jylla baroh kawei kam pat mynjur lang,” u la ong bad bynrap ba ka Sorkar kan sa bishar bniah halor ki jingkynnoh.
U la ong, “Khlem pep, lada don ka jingkynnoh, ka Sorkar kan pynshisha la ka dei kaba shisha ne kaba bakla. Kane ka dei ka kam kaba hakhmat eh”.
Halor ka jingkam ki nongshong shnong ba ka thaiñ kala shah pynduh kam pynroi namar ka jingpyrshah ïa ka jingtih Uranium, u Symbud Myntri Rangbah u la kyntait ban pdiang ïa kane.
“Ka long kaba bakla shibun. Phi iohi, haba ngi ai ïa kano-kano ka kam pynroi, ka Sorkar kam ju don ïa ka jingtharai sniew ha lyndet jong ka. Ka kam pynroi ka dei ka kam pynroi. Ka Sorkar kala sam mar katjuh ïa ka kam pynroi ha kylleng ka Jylla,” u la ong.
Halor ka jingud ïa ka jingsniew ka surok bad ka jingbym biang ki jaka sumar, u la ong ba ka Sorkar kala pyrshang ban pynjanai ïa ki lad pynïasoh ha baroh kawei ka Jylla.
“Ka surok kala don, hynrei ngi dang pyrshang kat kaba lah kum ka Sorkar ban ai surok ha baroh kawei ka Jylla. Hynrei, hooid, ngim ong ba ngi la ai ïa ki surok kiba paka kat sha kiba dawa. Hynrei kum ka Sorkar ngi sngap ïa ka jingdawa u paidbah, bad kat kaba lah, ngi pynbiang ïa ka surok,” u la ong.
