Shillong, Naitung 06
Ki dkhot ka Hynñiew-trep Youth Council (HYC) ha ka lah Sngi U Blei ki la pynlong ka jingpynap shrip ïa kiba dih bad kiba khaïi drok ha Barik ha kaba ki la ïoh ban bat haduh 11 ngut kiba dih drok ba kynthup ïa uwei u snar khaïi ka nongbah Shillong.
Kane ka jingpynap shrip ka HYC ka long hadien ba ki dkhot ka seng ki la ïoh ka jingtip ba thikna ba kine ki briew ki ju wan shong ban die ïa u drok ha kane ka jaka man ka sngi.
Ka seng ka la pynlong ka jingtohkit, ha kaba kitei ki nongdih drok ki la phla ba ki ju shong bad sah miet ha ki ïingjah kiba dei ki ophis barim jong ka tnad PWD, nalor kata ha ka jingkylli tohkit ka seng ka la lah ban buddien ïa uwei u snar khaïi drok ha kaba na utei u briew la ïoh bat da ki spah tylli ki tyndong drok ba thylli bad ki nar injek ha ryngkat ka pisa kaba long T. 8,000 tyngka tam.
Haba ïoh ban ïakren ïa ki briew kiba sah ha katei ka jaka ki pynpaw ba ki don ha ka jingsyier mynsiem bad ka jingbym shngaiñ shuh ban sah bad ym dei tang katta bun ki mar ki mata jong ki ruh la shah tuh naduh ba la ïeh ïingjah ïa kitei ki ïing ophis barim.
Ki la kdew naduh ba kitei ki ophis barim ki la kylla ïingjah, ki nongdih drok ki pynlong ktem jaka dih drok bad ym lah shuh ban ithuh ïa ka jingrung jingmih ki briew ha katei ka jaka, “Ki bun bha ki briew kiba wan nabar ba rung ba mih, wat ha ka por 5 baje mynstep, kynthei bad shynrang ki ïa wan ban shong rieh tngen ha kitei ki ïing” ki la ong.
La ong ba kine baroh ki sdang ban jia mynta la kumba 6 bnai tam eiei, naduh ba kitei ki ïing ki la kylla long ïingjah, kumta ki la kyrpad ïa ki bor ba dei peit ban phai khmat sha ki bad ban leh eiei na ka bynta ka jingshngaiñ jong ki.
