Jowai, Naitung 06
U Myntri ka Sorkar Jylla bad MLA ka Jowai Ma Wailadkimi Shylla ha ka 6 tarik Naitung u la plie paidbah ïa ka View point ne ka jaka peitkai pyngngad kaba don ha Pdein Chahtngit kaba hap hapoh ka Thadlaskein C&RD Block, West Jaiñtia Hills District.
Kane ka Viewpoint ka don harud ka surok Jowai bypass thymmai na Khliehtyrshi sha Treiongriang, la bei tyngka hapoh ka CM Catalytic fund ha ka jingpynïaid ka ophis u Deputy Commissioner West Jaiñtia Hills District bad ba la tei ha ka jaka jong ka Kong Jaijai Rymbai.
Na kane ka Viewpoint lah ban ïohi kyndiang ïa ka sor Jowai, ka wah Myntdu bad ïa ki pyntha kba ka Pynthor Nein.
U Ma Wailadmiki Shylla ha ka jingkren u la ïaroh ïa u DC ba hapoh ka jingïalam ka jong u, la lah ban pyndep hok ïa kane ka jaka peitkai kaba itynnad bha, kaba ka bor District kan aiti noh ha ka Dorbar Shnong Khliehtyrshi bad trai jaka ban khmih bad pynïaid ïa ka.
U Myntri u khmih lynti ba ha ki sngi ban wan kum kane ka jait jingthmu yn sa ïoh biang hapoh ka District.
Haba kren halor ka kam jngohkai pyrthei, u Ma Wailadmiki Shylla u la ong ba ka dei kawei ka bynta kaba pynkiew bha ha ka ïoh ka kot, bad u khmih lynti ba lyngba ka jingdon jong kane Viewpoint kan khring ïa ki nongwan jngohkai pyrthei kiba ym tang na ka Jylla, hynrei nabar ka Jylla bad kiba nabar ka Ri ruh kumjuh.
Katba na ka liang u Deputy Commissioner Abhinav Kumar Singh, IAS, u la ong, ka jingthmu jong kane ka jingtei ka long ban pynleit jingmut ha kaba pynroi ïa ka kam jngohkai pyrthei bad ban noh synñiang sha ki thong jong ka roi ka par. Ha kajuh ka por u la pyntip ba ha kane ka jaka yn sa shna sa ïa ki paiñkhana paidbah bad katto katne ki dukan kynthup ki dukan buh riam bad tiar tynrai.
Nalor u Myntri ha kane ka sngi la donlang ruh u BDO ka Thadlaskeiñ C&RD Block, u Dr. H. Niang, u waheh shnong Khliehtyrshi Ma Kitboklang Rymbai, ki nongshong shnong nalor kiwei-kiwei.
