Shillong, Naitung 06
Palat shi bynta na ka lai bynta jong ki nongthep ‘vote’ ha Meghalaya ki la ïoh pdiang ïa ki ‘Enumeration Form’ lyngba ka Special Intensive Revision (SIR)-2026 kaba dang ïaid shakhmat, ha kaba ka jingkiew ha ka kyrdan jong ki distrik ka pyni ïa ka jingïapher kaba ïar ha kylleng ka Jylla.
Katkum ka ‘Status Report’ kaba dang shu pynmih shen da ka ophis u Chief Electoral Officer (CEO) ha ka Lah Sngi U Blei, la sam haduh 8,62,594 tylli ki phom na ki 23,49,645 ngut ki nongthep ‘vote’, kaba long kumba 36.71%.
Ïa kane ka sienjam la pynïaid da 3,551 ngut ki BLO kiba treikam ha kylleng ka Jylla, ha kaba uwei-uwei u BLO u sam haduh 243 tylli ki phom haduh mynta.
Ka kaiphod ka pyni ruh ba ka South West Garo Hills ka don hakhmat eh na baroh ki distrik, ha kaba 79.55% na ki 1,08,883 ngut ki nongthep ‘vote’ jong ka, ki la shah kynthup hadien ba ki la ïoh pdiang ïa 86,615 tylli ki phom.
Ka North Garo Hills ka wan ba-ar, da 55.98% ha ryngkat 80,468 tylli ki phom ba la sam, bud sa ka East Garo Hills – 42.34% bad 48,593 tylli ki phom ba la sam.
Ha ki jingkheiñ ba pura, ka West Garo Hills ka don hakhmat duh ha ka thup jong ki phom ba la sam, kata haduh 1,51,117 tylli – kaba kynthup ïa 38.07% na ki nongthep ‘vote’ jong ka.
Ka East Khasi Hills kaba don bun tam ki nongthep ‘vote’ kaba long 6,32,146 ngut, ka la pyndep ïa ka jingsam sha 2,07,420 ngut ki nongthep ‘vote’, kata 32.81%.
Ha kawei pat ka liang, la ong ba ka East Jaiñtia Hills ka dei kaba duna tam ha ka liang ka jingsam ïa ki phom, kaba long 18.69% bad ki phom kiba la sam ki long 19,517 tylli. Haba phai sha South West Khasi Hills, ka long 20.75% bad la sam ïa 16,722 tylli ki phom, katba ka West Jaiñtia Hills ka la kynjoh sha ka 23.94% ha ryngkat 52,787 tylli ki phom kiba la sam.
Ka jingkheiñ kyllum ïa ki nongthep ‘vote’ bad ki BLO ne ka ‘Elector-to-BLO Ratio’ ka long 662 tylli, hynrei ka ïapher bak-ly-bak. Ki BLO ka North Garo Hills ki khmih mar 817 ngut ki nongthep ‘vote’, katba ki BLO jong ka South West Khasi Hills pat ki khmih ïa 564 ngut.
Ka jingbun tam ki phom ba la sam da man u BLO ka long ha South West Garo Hills, kaba long 516 tylli, bad kaba duna eh ka dei ha South West Khasi Hills, kata 117 tylli.
Ha ryngkat 63.29% ki nongthep ‘vote’ ki bym pat ïoh ïa ki phom, ka ophis jong u CEO ka la ong ba ka jingpynshisha na kawei ka thliew ïing sha kawei pat kan dang bteng ha ki taïew ban wan.
Ki nongthep ‘vote’ ki lah ban pan jingïarap lyngba ka ‘1950 Toll-Free Helpline’ lane da kaba ‘download’ ïa ki ‘app’ – ‘ECINET’ bad ‘Voter Helpline’.
Ïa ka SIR-2026, la pyntreikam lyngba ka sienjam jong ka Election Commission na ka bynta “Ka thup kyrteng kaba tikna, ka Synshar Paidbah kaba khlaiñ.”
