Shillong, Naitung 06
Hadien ba la mih ka jingkynnoh ba u Bah Willybert u la thok pisa sha kiba bun ki Samla, da kaba kular ban ai kam aijam ïa ki bad ba ki hap ban siew da ka pisa ban ïah ïa ka kam, ki don katto katne ngut ki briew kiba la mih shakhmat ban pynpaw ïa ka jingshisha.
Kine ki briew ki la mih shakhmat ban sei madan ïa ka jingshah thok pisa ha u tei u Bah Willybert Thangkhiew uba kular ban aikam ïa ki, ba kynthup ka kam pulit bad kiwei pat ki kam.
Haba kren sha ki lad pathai khubor hadien ba ki la dep ban leit ai ki sakhi sabut ha Sadar PS, kine ki briew ki la ïathuh ba u Bah Willybert u la kular ban ai kam ïa ki bad dawa ba ki hap ban siew pisa ha u, khnang ban ïoh ïa kata ka kam.
Haba kylli, ki la ithuh ba u Bah Willybert u kam ïalade ba u ithuh ïa ki heh ki haiñ bad ïa ki ophisar da kaba phah siew ïa ki 50 hajar tyngka bad da ki lak ban pynrung kam Sorkar. Haba pynpaw halor ka jingshah thok, u wei u Samla u la ïathuh ba u la siew ïa ka pisa 25 hajar bad hadien ba u ïoh jingtip na ki paralok, ba u Bah Willybert u ju thok, kumta u la phah pynphai noh ka pisa, hynrei u Bah Willybert pat u la byrngem pynban ïa u.
U la ïathuh ba hadien ba la pyntip noh sha u Bah PS Lyngdoh halor kane ka jingjia, u la phone ïa u Bah Willybert bad hadien kata u sa pynphai ïa ka pisa jong u. “Kane ka jingmih jong nga shakhmat pat ka long ba ki paidbah ki tip bad husiar, ïa kum kine ki jait briew,” u la ong.
Kane ka kam thok pisa ka la paw pyrthei hadien ba u Bah PS Lyngdoh u la ujor ejahar pyrshah ïa u Bah Willybert, hynrei hadien kane ka jingshah ujor u Bah Willybert u la mih shakhmat ban pynshai ba um pat ju thok pisa ïa ki briew da kaba ong, ba u Bah PS u shu kynnoh ïa u namar ba u don daw ïa u shimet bad ong ruh ba ka jingpynphai noh jong u ïa ka pisa, kadei namar ka jingtieng ba u Bah PS Lyngdoh u la byrngem ïa u.
Na ka liang kawei pat ka kynthei Samla ka la ïathuh, ba u Bah Willybert u la kular ban ai kam ha Diengpasoh, ha ka kam PHC, da kaba pan pisa ban siew khyndiat khyndiat, kumta ka la pan jingïarap noh na u Bah PS Lyngdoh.
“Ngam pat ïakynduh bad u Bah Willybert hynrei nga shu ïakren beit lyngba ka phone. Ha ka jingïakren lyngba ka phone u Bah Willybert u la kular ban ai kam aijam. U la pan ruh ïa ki kot ki sla kiba donkam bad nga la ai ïa u ha ryngkat bad ka pisa,” la ïathuh katei ka Samla.
Ka pisa kaba nga la dep ai sha u Bah Willybert ka la poi sha ka 2 lak 57 hajar tam eiei da kaba phah lyngba ka Gpay. Haba ïadei bad ka jingsaitkhuid jong u Bah Willybert ba u khlem thok bad khlem shim ka pisa na ki briew, na ka liang kane ka Samla ka la ong ba u Bah Willybert u la shu saitkhuid bad u la shu thok.
“U wan ha ïing ruh ban ïapynbeit bad nga hynrei ngam treh namar ba u la thok da ki lak tyngka bad nga dei ban pynpaw pyrthei beit, khnang ba ki khun samla ka Jylla kin husiar ïa kiba kum kine ki briew kiba thok. Nga isynei khamtam lada shah thok ïa kiba duk ba suk,” la ong katei ka Samla.
