Shillong, Naitung 06
Ka Khasi Students’ Union, Shillong Mihngi Circle hadien ba ka la ïoh jingujor na ki bahaïing jong kawei ka khynnah kaba dang hapoh ka 18 snem ka rta, kaba la kynnoh ba uwei u nos bar Jylla ula jrong kti ïa ka ha ka por ba ka leit ban ïakynduh ïa u Medical Superintendent ka North Eastern Indira Gandhi Regional Institute of Health and Medical Sciences (NEIGHRIMS).
Haba kren sha ki nongthoh khubor u samla Samuel Kharbani Organising Secretary KSU ka Nongmensong Unit u la kynnoh ba utei u bar Jylla uba dei u nos u dei na ka Jylla Rajasthan bad ïathuh ba kane ka jingjia ka dei kaba la jia naduh ka sngi Saitjaiñ kaba dei ka 4 tarik Naitung, ha kaba na ka liang ka ïing jong katei ka lanot ki la ujor da ka ejahar ha Mawdiangdiang Police Outpost.
Haba kylli, u la ïathuh ba u Medical Superintendent ka NEIGRIHMS u la aidaw ba kane ka kam ka la don ha ka jingtohkit ki pulit bad ynda la wad jingtip ki pulit kim pat shimkhia eiei halor kane bad kim pat kem ruh ïa une u bar Jylla.
U la ong ba na ka por sha ka por ka KSU ka pyrshah ïa ka jingwan ïalam ïa ki nos kiba nabar hynrei wat hapdeng ki jingpyrshah ruh ki bor pynïaid Hospital ki leh bym ïohsngew, namar kata ka KSU ka la kren shai ba kan nym ailad ïa kane wat lada hap ban shim da kiwei ki sienjam ruh.
Ka KSU ka la dawa ruh na ka tnad pulit ba ka dei ban shimkhia bad ban kem mardor ïa une u riew shim kabu.
