Shillong, Naitung 06
Ha ka jingpynlong ïa ka jingkhynra ïa ki nongkhaïi drok ha Lum Survey ki pulit jong ka Anti-Narcotics Task Force (ANTF) ki la kem ïa ki shijur bad ïoh kurup drok ha ka jingkhia ba long 14.42 gram ha ryngkat 116 tylli ki tyndong drok ba thylli.
Katkum ka jingïathuh jong u Superintendent of Police ka East Khasi Hills u Bah Vivek Syiem, ki briew jong ka Anti-Infiltration Drive (AID) bad Anti-Narcotics Task Force (ANTF) ki la talasi ïa ki 35 ngut ki briew ha ka 6 tarik u Naitung 2026, kum shi bynta ban ïaid shakhmat ban khanglad ïa ka jingkhaïi drok.
“Haba ïohi ïa ki pulit, katto katne ngut ki briew ki la phet krad noh” la ong u Bah Vivek, napdeng kito kiba la shah talasi baroh 35 ngut ki briew ki la pyni ïa ki kot ki sla ba dei na kiwei ki Jylla. Ki pulit ki la ong ba kine ki kot ki sla “donkam ban pynshisha na kito ki Jylla”
Ha kane ka jingkhynra ki briew jong ka ANTF ki la ïoh kem ïa arngut ki briew kiba la tip kyrteng kum u Rahim Ali ba 43 snem ka rta bad ka Jaibanu ba 35 snem ka rta.
La pynrung mukotduma ha Sadar Police Station, vide Case No. 242(7)2026 katkum ki kyndon 21(b)/29 jong ka aiñ NDPS bad ka jingtohkit ka dang ïaid shakhmat.
Ïa kane ka jingïaid lynti la pynlong da ki pulit jong ka East Khasi Hills kum shi bynta ban pynkhlaiñ ïa ka jingkhynra pyrshah ïa ka jingkhaïi drok hapoh ka District.
