Jowai, Naitung 06
Ka tnad Divisional Forest, Jaiñtia Hills Territorial Division kala khang khyrdep ïa 4 (Saw) tylli ki karkhana ot dieng beaiñ kiba treikam hapoh u pud u sam jong ka Division.
Ïa ka jingkhynra la pynlong da u Range Forest Officers jong ka Saipung bad Jowai Territorial Ranges ha ka 3 tarik haduh 6 tarik Naitung.
La sdang ïa kane ka jingkhynra hadien ki jingujor ba la ïoh na ki seng treimon sngewbha, ryngkat bad ki jingtip ba bniah bad ka jinglap ïa ki jaka da ki briew jong ka tnad, ong ka tnad khlaw.
Ha katei ka jingkhynra, ki la khang saw tylli ki karkhana ot dieng beaiñ ryngkat bad ki dieng sawdong bad dieng tylli kiba dang pyntrei bad buh ha kitei ki karkhana.
Halor kane, ka tnad kala rejistar pyrshah ïa ki trai jong kitei ki karkhana ot dieng be-aiñ katkum ki kyndon aiñ jong ka tnad.
U Divisional Forest Officer, Jaiñtia Hills, u la kyrpad ïa ki paidbah ba kim dei ban pom dieng beaiñ, shalan, khaïi dieng beaiñ, lane seng bad pyntreikam ïa ki karkhana ot dieng khlem ka jingïoh jingbit.
U la bthah ruh ïa baroh ki ophisar bad ki nongtrei ban bteng ka jingkhynra kaba jur pyrshah ïa kitei ki kam be-aiñ ha kylleng ki jaka ba hapoh ka Division.
Haba pynpaw ïa ka zero-tolerance policy jong ka tnad, u Divisional Forest Officer u la maham ba yn shim da ki kyndon aiñ kiba tyngeh pyrshah ïa kino-kino ki riew shimet ne ki jaka treikam kiba lap ba ki donkti ha ka jingpom dieng be-aiñ, ka jingkit, jingbuh, jingkhaïi ïa ki mar khlaw kiba long pyrshah ïa ka aiñ.
