Shillong, Naitung 06
Kawei na ki projek ban tei pynbha ïa ki skul hapoh Meghalaya ka la ïaid shaid-shaid, ha kaba na ki 1607 tylli ki skul Government Lower Primary la dep ban tei pynbha ïa ki 1391 tylli ki skul hapoh ka prokram Mission Education, kaba long kawei na ki prokram kaba heh tam ban maramot bad pynbha ïa ki skul hapoh ka Jylla. La ong ruh ba ka jingtei pynbha ne maramot ïa ki skul kiba dang sah, kata kumba 216 tylli ki dang ïaid shaid-shaid shakhmat.
Kane ka prokram kaba la kyrshan da ka jingbei tyngka kaba jan T.1,000 klur, ka kynthup ïa baroh 12 tylli ki district bad ka kynthup ïa ka jingtei, maramot bad jingpynbha ïa ki skul lower primary, upper primary, secondary bad higher secondary.
Ka Sorkar ka la ong ba palat 2 hajar tylli ki projek pynbha skul la shim hapoh ka Mission Education. Nalor ka jingshna pynbha ïa ki skul ba la don lypa, kane ka prokram ka la pyndep haduh 191 tylli ki LP School kiba thymmai ne kiba la pynkiew kyrdan bad 7 tylli ki upper primary school hapoh ka Phase I, katba 100 tylli ki LP school la mang hapoh ka Phase II. Sa 117 tylli ki LP school kiba dang ïaid ka kam hapoh ka Phase III, bad 186 tylli ki jingtei thymmai jong ki LP school bad Secondary School kiba dang don hapdeng ka jingkhot thep Tender ha ka Phase IV. Ki heh Sorkar ki la ïathuh ba ki kam ki kynthup ïa ka jingpynbha ïa ki tnum, ki kynroh, ban pynbun mala, ki jingkhang bad ki jingkhang ïit, ryngkat bad ka jingpynbun kamra class, ki library, ki tiar bad ka jingpynbha ïa ki jaka leit shabar.
La pynkiew kyrdan ruh ïa ki Upper Primary School hapoh kane ka Mission.
Ka tnad pule puthi ka la ong ba ka la buddien ïa ka jingïaid shaphrang jong kine ki projek lyngba ka Geotag ban pynthikna ba ki kam ki ïaid beit ïaid ryntih.
Haba batai ïa kane ka Mission kum ka jingpynkylla stet ïa ki jingtei jong ki skul hapoh ka Jylla, ka Sorkar ka la ong ba ka Mission Education ka thmu ban pynbha ïa ki jaka pule ha kylleng ka Meghalaya kaba pyni ïa ka jingmang tyngka kaba heh tam ha ka pule puthi ha kine ki snem ba la dep.
