Amlarem, Naitung 07
U Myntri ka Tnad pule puthi ka Jylla uba dei ruh u MLA ka Amlarem u Bah Lahkmen Rymbui ha ka 4 tarik Naitung u la aiti pura ïa ka Government Secondary School kaba thymmai ba la tei hapoh jong ka skhim Rashtriya Madhyamik Shiksha Abhiyan (RMSA), sha ka shnong Jongushen hapoh Amlarem Sub-Division.
Ka jingseng ïa kane ka Secondary School ka long ka sienjam kaba kongsan ban kyntiew ïa ki jingroi ba ïadei bad ka pule puthi hapoh ka thaiñ bad ban pynïar ïa ka jingïoh lad ha ka jingpule ha ka kyrdan Secondary na ka bynta ki khynnah jong ka thaiñ.
Da ka jingdon lypa ïa ka Lower Primary bad Upper Primary School hapoh ka shnong, kane ka Secondary School bathymmai kan pynlah ïa ki khynnah ba kin bteng ïa ki jingpule jong ki kham jan sha la ki jong ki ïing ki sem, ka ban pynduna ïa ka jingdonkam ban leit sha ki skul kiba jngai bad da kaba pynthikna ruh ban pynïoh ïa ka jingpule kaba bha tam.
Haba kren ha ka jingïalang, u Bah Lahkmen u la pynskhem ba ka pule puthi ka dang long kawei na ki mat kaba hakhmat eh jong ka Sorkar bad ka lad kaba khlain ban pynkupbor ïa ki briew shimet bad ban kyntiew ïa ka imlang sahlang.
U la ong ba ka jingseng ïa kane ka Secondary School kaba thymmai ka pyni ïa ka jingangnud kaba bteng jong ka Sorkar ban pynïoh ïa ka jingai jinghikai kaba mar-ryngkat bad kaba bha tam, khamtam na ka bynta ki khynnah ha ki thaiñ nongkyndong bad ki jaka kiba kyndong tam.
U Myntri u la pynshlur ïa ki khynnah pule ba kin shim ïa ka kabu ba la pynïoh lyngba kane ka jaka pule kaba thymmai da kaba bteng ïa ka jingpule da ka jingaiti lut, ka jinglong ryntih bad ka jingkut jingmut.
U la kyntu ruh ïa ki kmie ki kpa, ki nonghikai, ki nongïalam shnong ba kin ïatreilang ha ka ban pynroi ban kyntiew ïa ka jingnang jingstad, ka jingtei ïa ka jinglong ba bha bad kum ki nongshong shnong ba don ïa ka jingkitkhlieh.
Haba pynpaw ka jingsngewnguh ïa ki nongïalam shnong, ki nongshong shnong bad baroh kiba noh synniang na ka bynta ban seng ïa kane ka skul, u Myntri u la batai ïa kane ka jaka pule kum ka sharak jong ka jingkyrmen bad ka lad na ka bynta ki pateng ki ban wan.
Ha kane ka prokram la ïa don lang u Rangbah Shnong, Secretary Shnong, ki dkhot ka Village Education Committee, ki nongïalam hapoh ka imlang sahlang, ki kmie ki kpa, ki nonghikai, ki khynnah skul bad ki nongshah khot sngewbha.
