Shillong, Naitung 07
Ka jingwanrah ka tnad Election Commission of India ïa ka Special Intensive Revision (SIR) ha ka ri India kan wanrah ka jingmyntoi namar kito kiba shong ha ki jaka khappud ki hap ban pyndonkam noh tang kawei ka EPIC.
Namar haduh mynta ki don ki nongthep vote kiba sah ha ki shnong ba kajia pud ha Meghalaya bad Assam ki don EPIC ar tylli kawei ha Assam bad kawei ha Meghalaya.
Haba ïoh ban ïakren bad u Bah Pynshngain Rattane uba dei u President ka United Karbi People’s Organi-sation (UKPO) u la ïathuh ba um lah ban ong la kan wanrah jingmyntoi ne duh jingmyntoi ïa kiba shong ha khappud Meghalaya bad Assam.
U la ïathuh ba katkum ka jingïoh jingtip jong u ba kito kiba don EPIC kin hap ban pynïasoh bad u Adhaar kumta kito kiba don EPIC ha Meghalaya lada ki la pynrung kyrteng ïalade ïa u Adhaar sha Meghalaya kin hap ïoh ha Meghalaya, katba lada kito kiba la pynrung kyrteng ïalade ha u Adhaar sha Assam ka EPIC jong ki ruh kin hap noh sha Assam.
Katkum ki khubor ki ïathuh ba kiba bun kiba sah ha khappud ki ju pyndonkam baroh ar tylli ki EPIC kata lada don ka jingïathep vote ha Assam ki ïoh ban jied ïa u nongmihkhmat bad lada don ka jingïathep vote ha Meghalaya ki ïoh ban shimbynta ban jied nongmihkhmat lada dei MDC, MLA ne MP.
