Shillong, Naitung 07
Kawei ka Samla na Rilum Jaiñtia, kaba la ïoh ban wan phai noh na Pune, Maharashtra, hadien ba ka la lap ba ka kam jong ka kaba ka ïoh, kam ïahap na kaei kaba ka lah shah hikai lyngba ka Skills Meghalaya.
Ka jingwan phai jong ka, kadei namar ka jingshem ba ka kam, kam ïahap na kaei kaba la batai na Shillong bad kaba long khongpong, namar ïa ka la shah hikai ha ka kam pynbha-briew lane ka Beautician, hynrei haba poi ha Pune, ka kam ka long pynban ban khem-met lane ka Spa.
Ka jinghikai Beauti-cian Course kaba katei ka Samla ka la ïoh ban pyntbit ha ki por ba la dep, kadei kaba lai bnai ha Khliehriat, East Jaiñtia Hills District, kaba wan lyngba ka Skills Meghalaya ba la pynïaid da ka Meghalaya State Skills Development Society ha ka jingïatreilang bad kiwei pat ki bynta jong ka Sorkar Meghalaya.
Ka Skills Meghalaya nalor ka Beautician Course, ka ai ruh ki jinghikai pyntbit ha ki kam bapher-bapher ïa ki samla ha kylleng ka Jylla bad mang lypa ïa kiba la pyntbit ban ïoh kam ha ki Agency ba ka Sorkar ka ïateh bad kiba don shabar Jylla.
Hynrei ka jingwanphai katei ka Samla, ka sei ïa ka khubor kaba pynpaw ka jingbym shngaiñ na ka bynta ki Samla kynthei bad ka buh jingkylli ba ki Agency kiba kumno ka Sorkar Jylla ka ïateh ban ai kam ïa ki Samla haba ki la dep shah hikai.
Kumba paw na ka jingïathuh kane Samla ka bym kwah pyni durkhmat bad pynpaw kyrteng ïalade ka la ong, ba ki don kiwei-kiwei ki samla na ka Jylla, kiba hap ban trei ha ka kam khem met ym katkum ki jinghikai ba ki ïoh.
Nalor kata ka la ïathuh ba haba ka la ong ïa ki bor pynïaid, ba ka kwah wan ïing pynban ki la pan pisa 25 hajar tyngka ei-ei bad bun ki phah ban buhrieh ïa ka kam khem-met bad bthah ba kam dei ban ïathuh briew.
Kane ka Samla ha ka por ba ka pyrshang ban wan phai ka la poi pan jingïarap na u bahaïing jong ka bad uba la pan jingïarap na ki briew kiba u ithuh kiba sah ha Shillong.
Lyngba jong kine, la lah ban pyllait ïa katei ka Samla ba kan wan phai khlem da donkam ban siew ïa katei ka pisa, namar ka jingdon kiba pynïakren.
Kane ka Samla ka donbok ban ïoh wan phai, ka jingkylli kaba mih mynta ka long ba kan jia aiu ïa kiwei pat kiba ym don lad ban mih na kum kitei ki jaka khem met.
