Shillong, Naitung 07
U Executive Member ka Khasi Hills Autonomous District Council (KHADC) ba khmih ïa ka tnad Land u Bah Powell Sohkhlet u la pynpaw ka jing-sngewkhia halor ka jingmih ki khubor lyngba ka Khasi Students’ Union (KSU), ba ka la don ka jingthmu thied jaka ki MLA barim sha ki jaka ba don ïa u Uranium.
“Kane ka lah ban buh ïa ka jingma kaba khraw ïa ka ri bad ka jaidbynriew baroh kawei, la ong u Bah Powell Sohkhlet haba kren sha ki lad pathai khubor.
U Bah Powell u la ong, ba na ka liang ka District Council kan sa pan ki jingtip ba kham bniah na ka KSU halor kane ka kam thmu thied jaka ki heh ha ki jaka ba don ïa u marpoh khyndew u Uranium.
Da kaba u la pynthikna ba ka Voice of the People Party (VPP), ka pyrshah bha ïa ka jingtih Uranium ha ka Jylla.
U la pynkynmaw ruh, ba u Bah Ardent President ka party ha ka por ba u don bad ka party UDP ruh, u dei u wei uba ju ïai pyrshah bha ban tih ïa u Uranium. “Haba ïadei bad ka ‘Inquiry’, na ka liang jong nga bad u Bah Mathew ngin sa rah sha u CEM bad ka EC baroh kawei, kaei kaba ngi lah ban leh halor kane,” u la bynrap.
Haba kylli halor ka jingkwah ka KSU ïa ka ‘resolution’ na ka District Council ban ïada ïa ka khyndew ka shyiap, u Bah Powell u la ong ban sa pynlong ïa ka jingïalang ha kine ki sngi ban wan, ban ïakren haba ïadei bad kane ka mat bad kumjuh ruh kiwei de ki mat.
