Shillong, Naitung 07
Ka Voice of the People Party (VPP) State Youth Wing bad ka Women’s Wing ha ka 06 tarik u Naitung 2026, ki la leit sha NEIGRHIMS hospital, hadien ba ki la ïoh ka jingtip ba ka don ka Molestation case.
Ka VPP lyngba ki nongïalam, ki la ïoh ban kynduh ïa ka kmie bad ka khynnah ba dang 15 snem (minor) ha kaba ki la ïathuh, ba ka don shisha kata ka jingjrong kti jong uwei u nos ïa ka, hadien ba ka la mih na OT room ban puid apendix, bad hadien ba la dep puid la rah ïa kane ka khynnah ha recovery room, bad une u nos shynrang, u la sdang ban jrongkti bad leh kynshleiñ ïa kane ka khynnah.
La ïathuh ba une u nos shynrang u la ktah bunsien ïa kane ka khynnah bad ban leh kynshleiñ bad haba ka kmie ka ïohi ba ka khun ka shu ïam beit, ka la kylli, balei ka ïam bad kane ka khynnah ka la ïathuh ïa ka jingjia baroh ha ka kmie.
Na ka liang ka VPP Youth Wing mar syntip halor kane ka jingjia, ka la leit ban kynduh ïa ki bor ba halor jong ka hospital, ban wad jingtip bad pan jingshai bad ka la don ruh ka jingtohkit na ka liang ka tnad pulit bad ka MSCW ruh ki la poi lang ha katei ka sngi.
Namar une u briew u dei ba la ju mlien bunsien ïa kine ki jait kam bad u dei u bar jylla katkum ka jingïathuh, ka kmie bad kane ka khynnah ba shah jrongkti, ka VPP Youth Wing, ka dap da ka jingkyndit bad ka jingsngewkhia bad jingbitar, ba kine ki wan jia kumne ïa kane ka khynnah.
Ka VPP YW ka la ong ruh ba haba ka wan ban shah sumar hynrei la ngat pynban ha kane ka kam ba sngewsih.
Ka VPP ka la buh jingkylli, ba kat ka Hospital NEIGRIHMS ruh kam lah ban ai ïa ka jingpynthikna ban ïada na bynta ki kynthei ba wan sumar.
“Ngi sngew ban pynrem jur ïa kane ka kam beaiñ, bad dawa ba ki bor jong ka hospital, kim dei ban tuklar ïa ka jingtohkit ka aiñ, khnang ban ïoh kem wut-wut ne pynshitom ïa une u runar bad ka aiñ, ki pulit ki la ïoh ïa ka FIR na ka ïing, ki dei ban pynsted bad kem wut-wut ïa une u briew,” la ong ka VPP.
Kumta na ka liang ka VPP Youth Wing, ka kyntu ïa ki bor ka aiñ, ba dei ban pynsted ïa ka jingtohkit (investigation) bad kem mardor ïa une u briew uba ju mlien ban leh ki kam dakaid bad kam riewkhlaw.
