Nongpoh, Naitung 07
Ha kawei ka jingjia tyngkhuh kali kaba shyrkhei kaba la jia ha ka janmiet jong ka sngi Nyngkong, lai ngut ki samla ki la duh noh ïa la ka jingim hadien ba ka scooty kaba ki shong, kala leit ban tynrah nadien jong kawei ka trok kaba ïeng harud ka surok Shillong Bypass ha Umroi.
Katkum ka khubor kaba la ïoh lum, la ïathuh ba katei ka jingjia ka dei ha ka por kumba 8:30 eiei ha kaba lai ngut ki samla kiba dei na ka shnong Umden Umsaitprah, kiba la shong da kawei ka scooty kila leit ban tynrah nadien jong ka trok kaba pynïeng harud surok marjan bad ka madan ïalehkai phutbol.
La ïathuh ruh ba ha kane ka jingjia, kitei baroh lai ngut ki samla kiba ym pat tip kyrteng satia, kila duh noh ïa la ka jingim namar ka jingmynsaw jur ha katei ka jingtyngkhuh.
Na ka liang ki pulit ka Khapmara PIC ki la wan poi mar mar ha katei ka jaka na ka bynta ban pynlong ïa ka jingtohkit bad ban pynkit ruh ïa ka met kaba sah jong kitei ki samla sha Nongpoh Civil Hospital na ka bynta ban pyndep ïa ki jingdonkam katkum ka aiñ.
