Shillong, Naitung 07
U nongïalam ka BJP bad MLA ka Pynthorum-khrah, Bah A.L. Hek ha ka Sngi Ba-ar u la kynnoh ba ki don ki kynhun seng kiba pyndonkam bakla ïa ki jingmyntoi hapoh jong ka Foreign Contribution Regulation Act (FCRA), watla bun ki kynhun niam ki ïai bteng ban shakri hok ïa kiba duk ba kyrduh.
Haba kren bad ki nongthoh khubor, u Bah Hek u la ong ba watla u la kyrpad ïa ka jingpyllait hapoh ka FCRA, ha kajuh ka por ka long ruh kaba donkam ban khmih bniah kumno la pyndonkam ïa ki kyndon.
“Khlem da jer kyrteng ïa kano-kano ka kynhun ne ka niam, ki don katto-katne ki kynhun ki bym shym la pyndonkam hok ïa ka pisa jong ka FCRA, hynrei ki ïai bteng ban ïoh ïa ki jingmyntoi. Kata ka donkam ïa ka jingpeit bniah,” la ong u Bah Hek.
“Ha kajuh ka por, ki don bun kiwei pat ki kynhun niam – ngan ym jer kyrteng ïa ki – kiba leh ïa ki kam kiba bha ha ka ban shakri ïa kiba duk bad ba kyrduh,” u la bynrap.
Na ka liang u Bah Hek u la ong ba u la thoh ruh sha u Myntri Rangbahduh ka ri, u Narendra Modi ban kyrpad pyllait hapoh ka FCRA bad u la ïoh pdiang ruh ïa ka jingpyntikna na ka tnad Law & Justice ka Sorkar Pdeng da kaba kdew ba yn sa khmih bniah ïa ki jingtyrwa jong u.
“Nga la thoh ruh sha u Myntri Rangbahduh ka ri, u Narendra Modi, bad nga la ïoh pdiang ïa ka jingpyntikna na ka tnad Law & Justice ka Sorkar Pdeng, kaba pynpaw ba yn sa khmih bniah ïa ki jingtyrwa jong nga,” u la ong.
Une u MLA ka BJP u la ong ba ka jingthmu ba kongsan jong u ka long ban wanrah lang ïa baroh ki nongshim bynta na ki kynhun niam bapher-bapher na ka bynta ban ïakren halor kane ka mat.
“Nga la thoh sha ka Sorkar India ban kyrpad leh eiei bad ban pyrkhat halor kane. Ka jingthmu ba kongsan jong nga ka long ban wanrah lang ïa baroh ki nongshim bynta na ki kynhun niam bad ki kynhun seng ban ïakren halor ka FCRA,” la ong u Bah Hek.
U bynrap ba u la dep ban ïakren ruh bad ka Catholic Bishops’ Conference of India (CCBI) ha Delhi lem bad ka NEICC ha ophis treikam jong u ha Golf Links, Shillong.
U Bah Hek u la kdew ruh ba u Myntri Rangbah ka Jylla u la ïakynduh ruh ïa ki nongmihkhmat jong ka NEICC, ka Balang Baptist, ka Balang Katholik, bad u Myntri kam pohïing ka Sorkar Pdeng, u Amit Shah halor kane ka kam.
“Nga la pule ha ki khubor ba u Myntri Rangbah ka Jylla u la ïakynduh ïa ka NEICC, ka Balang Baptist, ka Balang Katholik, kumjuh ruh ïa u Amit Shah,” u la ong.
Halor ki jingsngewkhia ba ka Sorkar Pdeng kam sngap ïa ki jingeh ba la pynpaw, u Bah Hek u la ïada ïa ka rukom treikam jong ka Sorkar.
“Kumno phin ong ba kim sngap ïa ka jingud-jingnam jong ki paidbah? Ki dang khmih bniah ïa kane ka kam. Baroh ki jingmyntoi bad ki jingduhnong hap ban da pyrkhat bha, shuwa ban shim ïa ka rai kaba khatduh. Ngi don hangne bad ngin ïai bteng ban buddien ïa kane,” u la ong.
