Shillong, Naitung 07
U nongïalam ba rangbah bad MLA ka BJP, Bah A.L. Hek ha ka Sngi Ba-ar u la pynpaw ïa ka jingkyrmen skhem ba ka seng kan sa thaw ïa ka Sorkar ban wan ha Meghalaya ha u snem 2028, bad kyntait ïa ka jinglah ban don kano-kano ka jingïateh lok hashuwa jong ka ilekshon.
“Ngeit ïa nga, ha u snem 2028, kan dei ka Sorkar ba ïalam da ka BJP ha Meghalaya. Kata ka long kaba shai. Ki nongïalam ba halor ka ri kin sa rai mano ban long nongïalam, hynrei nga ïathuh biang sha phi ba ha u snem 2028, kan dei ka Sorkar ba ïalam da ka BJP ha Meghalaya,” ong u Bah Hek haba kren sha ki nongthoh khubor.
Haba kylli la ka seng ka pyrkhat ne em ban ïateh lok hashuwa jong ka ilekshon, u la ong ba ka BJP ka thmu ban ïakhun hi marwei ïa ka ilekshon sha ka Ïingdorbar Thawaiñ.
“Ngin leit hi marwei. Yn ym don kano-kano ka jingïateh lok bad kano-kano ka seng saiñ pyrthei hashuwa ka ilekshon,” u la pynskhem.
Haba kylli halor ki jingïakren shane-shatai ba kan don ka jingkylla ha ka kam nongïalam (President) ha ka Jylla hashuwa jong ka ilekshon 2028, u Bah Hek u la ong ba kane ka kam ka hap hapoh ka jingpeit jong ki nongïalam ba halor jong ka seng.
“Kata kan shong ha ka rai jong ki nongïalam ba halor ka ri. Ngan ym lah ban kren eiei halor kano-kano ka rai ba la shim ha ka kyrdan jong ka ri,” u la ong.
