Shillong, Jylliew 07
Ka Jaiñtia Coal Owners, Miners, Suppliers, and Workers Association (JCOMSWA) ka la pynpaw ba haduh mynta kam shym la pyndem hakhmat ka Sorkar namar ka dawa beit ba dei ban plie ïa u dewïong na bynta ban ïoh kamai jakpoh ki duk ki rangli.
Katkum ka kyrwoh ba la phah da u Bah Overcome Dkhar uba dei u Information Secretary u la ïathuh ba ka seng ka la ïakynduh haduh lai sien ban ïakren halor ka kam tih dewïong hynrei ka seng kam shym la pyndem namar ka kwah ban wanrah biang ka jingtih dewïong na bynta ki duk ym tang ïa kiba riewspah.
U la ïathuh ba naduh ba la shah thngan u Bah Marshal Biam uba dei u President, haduh mynta ka seng ka khlem shongthait ban dawa na ka Sorkar ba kan plie biang ïa u dewïong ban wanrah biang ka kamai jakpoh jong ki paidbah kiba la mad jingeh mynta la khadar snem.
U la ïathuh ba ka seng hapoh ka jingïalam u President Bah Marshal Biam ka la dep shong jingïalang bad ki bor Sorkar ha ka 23 tarik Jylliew, 29 tarik Jylliew bad 3 tarik Naitung hynrei ka seng ka khlem pyndem namar ka ïeng halor ka nongrim ban plie beit ïa u dewïong ban ïoh tih kiba rit ba ria ym dei ban plie ïa u heh u hain.
Shuh shuh u la kyntu ïa ki paidbah ba ki dei ban ïa mih ryntih lada ka seng ka pynbeit ban pynlong jingïakhih khnang ban wanrah ïa ka jingmyntoi ïa ki paidbah.
Kumban shu pynkynmaw u Bah Marshal Biam u la sdang ban shah thngan naduh ka 1 tarik Jylliew bad pynkut haduh 16 sngi hadien ba ka bor met jong u ka la tlot.
Kane ka jingshah thngan jong u ka la pynlong ïa ka JHADC ban khot ïa ka dorbar kyrpang ban ïakren shaphang ka jingtih dewïong bad ka la pynlong ïa u Myntri Rangbah ka Jylla u Conrad K Sangma ban leit ïakynduh kyrpang ïa u Myntri ka tnad coal and mines ka Sorkar India u Kishan Reddy ban kyrpad ban pyllait ïa ka jylla Meghalaya ban tih dewïong.
