Shillong Naitung 07
Ka Synjuk ki Nongsynshar Shnong ka Bri u Hynñiewtrep bad ka Synjuk ki Rangbah Kur Ka bri u Hynñiewtrep ha ka sngi Ba-ar jong ka taïew, ki la ïa lum lang ban ïatai halor ka jingpynkylla ïa ki aiñ jong ka Khasi Hills Autonomous District Council (KHADC).
Haba kren bad ki nongthoh khubor hadien ka jingïalang u General Secretary ka Synjuk ki Nongsynshar Shnong ka Bri u Hynñiewtrep, kata u Bah R.L Blah u la ong ba ka jingïalang mynta ka sngi na ka liang ka kynhun ka pyrshah ïa kane ka amendment bill 2026, bad ki la shim ïa ka rai ban dawa ban weng noh ïa ka Notification, bad ban thoh sha baroh ki shnong ki thaw ban ïatrei lang.
U la ong ruh ba hadien ba ki la biang nadong shadong, kin sa leit ban ïakynduh ïa u Lat ka Jylla, ïa u Myntri ba dei peit ïa ka tnad DCA bad kin ai kopi ruh sha u Myntri Rangbah ka Jylla.
Halor ka jingpyrshah jong ka kynhun, u Bah RL Blah u la ong, “Ka daw bah ba ki pyrshah, kadei halor ka Amendment Clause 16 kaba la weng noh ïa ki kyntien ‘In consultation’ bad ki Dorbar Shnong, ki dorbar Raid, na ka por sha ka por, ngi la ïakren ïa kane ka mat hynrei kam shym la poi shaei-shaei ruh.”
“Ngim pyrshah ïa ki rai ka District Council, ngi don ryngkat haba ïadei ban ‘digitalise’ ïa kine ban ïada ïa ka khyndew ka shyiap, ngi don ryngkat bad ki hynrei ban ong pat ba ym shim shuh ïa ka jingïamir jingmut lang ïa ki dorbar shnong, ki dorbar Hima ne dorbar Raid, ïa kata kim lah ban pdiang bad haduh mynta mynne, lada phi leit ban leh registration sha ka Revenue department ki pynshong nongrim halor ka dulir ka dor jong ka jingsoi kyrteng u Rangbah Shnong, ki dorbar shnong ki don ka iktiar ha ka, hynrei kumba ka long mynta ïa ngi ym ithuh shuh bad kan leh ka District Council, ngi pyrshah halor kata,” u la ong.
U Bah R.L Blah u la bynrap da kaba ong, ba ïa kaba la don balei ban weng ieh ka mat sah.
U la ong ruh ba ka jingthoh ka mih da kumwei, ka jingkren kadei da kumwei. “Kaei ka jingmut jong ki, lada ïoh ban ïa shonglang ban ïamir jingmut, ka lah ban poi sha kaba bha, ngim lah ban pule ïa ka jingpyrkhat ka jong ki bad ma ki ruh kim lah ban pule ïa ka jingpyrkhat ka jong ngi, hynrei da kaba ïashong lang kan shai, namar ha ka jingthoh ka mih kumto ha ka jingkren ka mih da kumwei,” u la bynrap.
U Bah R.L Blah u la ong, ba kin sa shong pyrkhat biang halor kane bad lada ka la kut hangne te ka la kut.
Shuh shuh na ka liang ki nongïalam ka kynhun, ki la ong ba ka District Council ka shim ïa ka rai khlem khot ïa ki ban ïakren, ka kynhun ka thrang ban pynsangeh ïa kane.
