Shillong, Naitung 07
U MLA ka Pynthorum-khrah uba dei ruh u nongïalam ba rangbah ka BJP, u Bah A.L. Hek ha ka Sngi Ba-ar u la ran dien noh ban ïakhun na ka ilekshon shiteng samoi ban wan sha ka Shillong Lok Sabha, hynrei u la tyrwa ïa ka kyrteng jong u Myntri Sorkar bad MLA ka South Shillong, Bah Sanbor Shullai ban long kum u kyrtong ka seng.
U Bah Hek u la ïathuh ba ki nongïalam ka seng ki la ïakynduh ïa u na ka bynta ban ïakhun ïa ka ilekshon shiteng samoi, hynrei u la kyntait da kaba kdew ba u don kiwei pat ki jingkitkhlieh.
“Ha kaba nyngkong, la bthah ïa nga ban ïakhun ïa ka ilekshon shiteng samoi. Hynrei nga la pyntip sha ka seng ba nga dang don katto-katne kiwei pat ki jingkitkhlieh ba nga dei ban peit ha kane ka por. Kumta ngan ym lah ban ïakhun. Ka rai kaba khatduh mynta ka shong ha ka seng,” ong u Bah Hek haba ïakren bad ki nongthoh khubor.
Une u nongïalam ba rangbah ka BJP u la ong ba u la ai jingmut ïa ka kyrteng jong u Bah Sanbor sha ki nongïalam ba halor jong ka seng ban khmih bniah.
“Nga la tyrwa ïa ka kyrteng jong u. Mynta ngin ap ïa ki nongïalam ba halor ka ri ban shim ïa ka rai. Mano-mano ba shah jied, ngin pdiang ïa ka rai bad ïakhun tyngeh,” u la pynpaw.
U Bah Hek u la kyntait ruh ïa ki jingsngewkhia halor ka jingpynslem ban pynbna ïa u kyrtong, da kaba ong ba ka seng ka dang don por hashuwa ka ilekshon.
“Ngi dang don por haduh kumba 20 tarik u Naiwieng. Kata ka ailad ïa ngi ban pynbna ïa u kyrtong jong ngi. Ka ilekshon ka dang sah sa kumba 5-6 bnai, kumta yn ym lah ban ñiew ïa kane kum ka jingpynslem. Ka por pynkhreh kaba 3 haduh 4 bnai ka long kaba biang palat na ka bynta ka ilekshon shiteng samoi,” u la ong.
Ka shuki jong ka Shillong Parliamentary konstitwensi ka la sah thylli hadien ka jingkhlad noh jong u MP.
Na ka liang ka Election Commission of India (ECI) kam pat pynbna ïa ka tarik ban pynlong ïa ka ilekshon shiteng samoi.
