Shillong, Naitung 07
Ka Voice of the People Party (VPP) Youth Wing, ha ka 7 tarik Naitung, 2026 ka la leit ban kynduh ïa u Bah R. Hinge, District Transport Officer, ban ïakren halor ka jingïohpdiang ka jingujor na ki paidbah bym biang ki ;counter’ ha ophis u District Transport Officer, East Khasi Hills District.
Haba kren sha ki lad pathai khubor, u Bah Marbud u la ong ba ha katei ka ophis treikam, ki don tang kawei ka ‘counter’ na ka bynta ki paidbah ban siew ïa ka bai khajna kali bad kumjuh ruh tang kawei ka ‘counter’ ban leh licence bad kane ka la buh jingeh ïa ki paidbah ban siew khajna kali.
U la ong ba ka por kaba la buh ban plie ruh ka long tang naduh 10 baje haduh 1 baje nohphai sngi bad kane ruh ka la buh jingeh ïa ki paidbah.
Shuh shuh u la ong ruh ba na ka liang u DTO u la mynjur ban kyntiew noh ïa ka por plie na ka 10 baje haduh 2 baje, bad haba ïadei pat ban buh sa kawei ka ‘counter’, u la ong ba un sa shimkhia mardor halor kane.
“Ngi ïohi ruh ba ha ka jingwan ha ophis u DTO, ki paidbah ki la ïa ïenglaiñ ban siew ka khajna bai kot kali, namar ki hap ban ïabeh ïa ka por, namar la buh ban khang noh ha ka por 1 baje nohphai sngi. Tang u wei u briew ruh ka la shimpor 15 ne 20 minit ban siew, bad kane ka shem jingeh bha ïa ki paidbah,” la ong u Bah Marbud.
U Bah Marbud u la ïathuh ruh ba na ka liang u DTO u la kubur ba ka por ka long kaba lyngkot bha bad u la ong ban sdang plie naduh 10 baje mynstep haduh 2 baje janmiet.
Nalorkata, u Bah Marbud u la kyrpad na ka Sorkar ba kadei ban buh noh sa kawei ka DTO ophis ha Shillong, khnang ba ka nym ban khia bad kan kham suk ïa ki paidbah.
