Shillong, Naitung 08
Ka Joint Co-Ordination Committee ka FKJGP bad KSU Upper Shillong Circle ha ka Sngi Balang ka la leit kynduh ïa u Director ka tnad Urban Affairs ban dawa pynduh pyndam noh ïa baroh ki soskular ai jaka sha ka M/S Ashok Auto Service & Patners ha 6-mer Upper Shillong ha kaba ka jingheh jong ka jaka ka long 13,181.00 Sq ft tam ne duna.
Ka Committee ka la dawa ba ïa ki soskular baroh ba ladep ïasoi da ka tnad bad ka M/S Ashok Auto Service & Patners ha Upper Shillong, ban ai jaka sha u bar Jylla dei ban pynduh pyndam noh ïa baroh.
Haba kren sha ki nongthoh khubor u President ka FKJGP Upper Shillong u Bah Kitboklang Nongphlang u la ong ba ka FKJGP bad KSU ki la pyrshah jur halor ka jingai jaka ïa uwei u bar Jylla ha 6-mer kaba dei ruh ka jaka jong ka Sorkar.
U la ong ba hadien ba la mih ka jingpyrshah na ka liang ka Sorkar ka la pynsangeh shipor, hynrei haba nang mih ki sngi, la ïohi ba ki bor Sorkar ki la pyrshang da kiwei pat ki lad ki lynti ban pynthame bad ïalam bakla ïa ki paidbah.
Katkum ka jingong u Bah Nongphlang katei ka jaka kaba ki pyndonkam mynta kaba la weng shipor, ka dei ka jaka jong ka Shillong Cantonment Board, hynrei hadien ba ka Cantonment kam shym la ai shuh ïa ka jaka ban shna Petrol Pump, kaba lyngngoh pat ka long ba ka Sorkar Jylla ka la phrung ïalade hapoh da kaba ïapeiñ ïa ka jaka jong ka Sorkar Jylla.
“Ha ka jingshisha haba dei ka jaka jong ka Cantonment bad ka khajna ruh la ïoh ka Cantonment, balei kynsan ka Sorkar ka phrung ïalade, imat don eiei sha lyndet ban ai jaka ïa u bar Jylla” la ong u Bah Nongphlang.
