Shillong, Naitung 08
Ka Khasi Students’ Union (KSU) Sengkmie ka la leit pyntip sha u Chief Executive Member (CEM) ka Khasi Hills Autonomous District Council Bah Winston Tony Lyngdoh namar ki don ki riew pawkhmat ka Jylla kiba mut thied ïa ki jaka ba don Uranium.
Ha ka jingïakynduh ïa u CEM, ka KSU ka la aiti ïa ki lai tylli ki mat kiba kongsan, kaba nyngkong ka long ban shim kawei ka rai (resolution) ha ka ïingdorbar thawaiñ ban khanglad ban tih ïa u Uranium ha ka
Jylla bad ba nym ai ïa ka No Objection Certi-ficate (NOC) da lei lei ruh halor kane ka bynta.
Kaba ar pat ban wanrah ïa ka Amendment ha ka “The Khasi Hills Auto -nomous District (Regu -lation & Administration of Land) Act, 2021” ne lehse ban thaw da kawei ka aiñ katkum ka Paragraph 3 jong ka Sixth Schedule ba nym shah ban die, aiwai (sale/transfer/lease) ïa ki jaka ba don u uranium sha ka Sorkar ne ka kompeni ne briew shimet ban tih ïa u marpoh khyndew.
Ban ai jingbthah sha ki Dorbar Shnong ki Dorbar Hima ba kin nym ailad ïa ki briew bad ki heh ophisar bad kiwei ki briew kiba na AMD ba kin ïoh rung sha ki thaiñ jong ka South West Khasi Hills District bad West Khasi Hills District, ha ki jaka ba don uranium. Kane kan pyntlot bad pynduh ïa ka jingthmu ba sniew jong ka Sorkar India bad ki briew kiba kwah shim kabu ban tih ïa u uranium.
Haba ïakren bad u President ka KSU Sengkmie u samla Raymond Kharjana u la ïathuh ba don ki riew pawkhmat ka Jylla kiba thmu ban leit thied ïa ki jaka ba don Uranium ban die pat sha ki kompeni ban ïoh tih ïa u Uranium.
U la ïathuh ba u CEM u la kular ban wad jingtip ïa kane ka bynta bad ban pynkhlain ïa ki aiñ bad ba un sa rah ha ka EC ba kin ïakren.
