Nongpoh, Naitung 08
U Deputy Commissioner bad Chairman ka DDMA, Ri-Bhoi District, u la pynmih ïa ka jingmaham paidbah na ka bynta ki nongwan jngohkai pyrthei kiba leit sha ki jaka jngohkai bapher-bapher ha ka distrik ha kane ka aiom slap, da ka jingthmu ban ïada ïa ka jingim bad ka jingshngaiñ jong ki paidbah bad ban lait na kino-kino ki jingjia ba sngewsih kiba lah ban jia namar ka jingslap jur, ka jingshlei um, bad ka jingtuid ka umsaw.
Na ka liang ka bor district ka kyntu ïa baroh ki nongwan jngohkai ba kin long kiba husiar bha haba leit sha ki wah, ki pung, bad kiwei-kiwei ki jaka shangkai bad jaka jngohkai.
La ai jingmut ïa ki nongwan jngohkai ba kin phong ïa ka life jacket haba don hajan ne ha um, bud ryntih ïa baroh ki jingbthah, ki lad jingïada bad ki jingmaham ba la pynbna bad ban peitngor ïa ki khynnah ha man la ka por bad khamtam ki dei ban peit lypa ïa ka jinglong jingman ka suiñ bneng shuwa ban pynbeit ïa ka jingleit shangkai.
La kyntu ruh ïa ki paidbah ba kin burom ïa ka kolshor bad ki riti dustur jong ki trai shnong, pyndonkam ïa ki lynti ba la buh kyrpang, bret ïa ki jaboh ha ki jaka ba dei ban bret, rah ïa ka um dih bad ki tiar kiba donkam, bad ïatreilang bad ki bor synshar, ki nongïalam lynti bad ki kynhun jingïarap haba donkam. Kito kiba leit sha ki jaka ba jngai ki dei ban pyntip lypa ïa ki bahaïing hasem ne ki paralok halor ka jaka leit jong ki bad lada don kano-kano ka jingjia kyrkieh, dei ban phone mar mar sha u number 112.
Ki bor district kila maham ruh ïa ki nongwan jngohkai ba kim dei ban jngi ha ki jaka ba la khang ne kiba ma haba slap jur, ne haba don ka jingshlei um, ne ban pynjulor ïa ka mariang, lane buh jingma ïa la ka jingim tang na ka bynta ban shon dur hajan ki bynta ba ma kum halor maw bad harud um.
Namarkata ki paidbah ki dei ban kiar na ka leit shangkai haba la pynmih ïa ki jingmaham shaphang ka jinglong jong ka suiñbneng bad ban nym leit hajan ki wah, ki bynta ba tuid um bad ki pung ha ka por slap ne hadien ba la kut ka jinghap slap namar ka um ka lah ban kiew sted bad ka lah ban buh jingma ïa ka jingim.
Na ka bynta kino-kino ki jingjia kyrkieh, ki bor district ki la pynbna ruh ïa ki nombor jingïarap kyrkieh kiba kynthup ïa ka Deputy Commissioner’s Office Helpline- 8131811911, ADC & CEO, District Disaster Management Department- 8575093625, District Disaster Management Officer- 9485005523, District Control Room- 6009906348, Police Control Room- 6909300160, Nongpoh Control Room- 8730940080 / 9856084514, bad ka Emergency Helpline- 112.
