Shillong, Naitung 08
Ka Khasi Students’ Union, North Khasi Hills District Unit ka la ai jingmut ïa ka Sorkar ba ka dei ban pynkynriah noh ïa ka Anti-Infiltration Check Gate kaba don ha Byrnihat sha ka jaka ba don ka Facilitation Centre kaba don ha Umling Ri-Bhoi District.
Kane ka jingai jingmut ka KSU ka dei ha ka jingïalang ba la khot na ka Commissioner Secretary ka tnad kam jngohkai ka Sorkar Jylla ka Kong R.M Kurbah, hadien ba ka seng ka la pynpaw ïa ka jingpyrshah jur haba ïadei ka jingpynkylla ‘Food Court’ ïa ka Facilitation Centre.
Haba ïakren sha ki nongthoh khubor u Samla Ferdynald K Kharkamni President KSU NKHD u la ïathuh ba ha katei ka jingïalang ka la don ka jingong ba ka jingpyntrei ïa katei ka jaka kam dei ka ‘Food Court’, hynrei u la kdew ba katkum ka jingtip ba ka seng ka ïoh ka dei ka jingtei ïa ka ‘Food Court’.
U la ïathuh ba na ka liang ka Kong Kurbah ka la kular ban pynlong ka jingjurip bad kan sa rah ruh ïa ka Detail Project Report (DPR) sha ka seng haba ïadei ka jingshna. U Samla Kharkamni u la ong ba ka seng kan sa ïakynduh ïa u Myntri Rangbah ka Jylla ban kylli, ïa kita ki tnad ki ban don hangtei bad hato ka Sorkar kan shimkhia ne em ban pyntreikam noh ïa ka MRSSA.
“Ngi sngewthuh ba napoh ka Ministry of Home Affairs (MHA) ka long ba kloi ban pynïaid shakhmat, namar kane ka MRSSA ka dei hi ka kamram jong ka Sorkar ban shna ïa ki aiñ ban tehlakam ïa ki briew ba wan nabar, la ki dei ki khynnah pule ruh dei ban tip ïa ki jingshisha, la ki dei ki ophisar ruh dei ban tip lane ki dei ki nongbylla kiba wan hangne ruh dei ban tip la ki dei ne em kiba biang ban trei hangne” u la ong.
Haba kylli u Samla Kharkamni u la ïathuh ba ka jingheh jong katei ka jaka ka long 28,000 square feet kaba ïoh na ka Transport Department ha u 2019, kaba ym don kino-kino ki jingtei ha kito ki por bad ka jingbym ïoh ïa ka jaka ha 19mer ka jaka ba 15 akar ban long jaka rung (Entry Point) bad kaba sngewtynnad ka long ba ka Transport Department ka kloi ban ai jaka ban pyntreikam ïa ka MRSSA.
Na katei ka 28,000 square feet ka Tourism Department ka shim 11,000 square feet bad ka jaka kaba sah ka long sa kumba 17,000 square feet, kaba pynlong ïa ka KSU ban buh jingkylli ba kata ka jaka ba sah ka long kaba bit ne em ban pynlong ïa ka jingpeit bniah ïa ka jingrung jong ki briew kiba wan nabar.
Shuh-shuh u la ong ba ka KSU ka dawa ba ka Sorkar ka dei ban pynsangeh shuwa ïa ka jingpyntrei ïa ka ‘Food Court’ katba ka jingïakren ka dang ïaid bad pynpaw ba ka thong ka seng ka long ba ka Sorkar ka dei ban pynthikna ka jingpyntreikam ïa ka Meghalaya Residents Safety and Security Act 2016.
