Shillong, Naitung 08
Ka Hynñiewtrep Youths Council (HYC) Seng-kmie ka la dawa na ka Sorkar Jylla ba ka dei ban weng noh mardor ïa kito ki 80 tylli ki ïing kiba sah be-aiñ ha Lum Survey lym kumta ka seng kan sa leh ïa kaba donkam.
Haba ïakren bad ki nongthoh khubor, u President ka HYC Sengkmie Bah Roykupar Synrem u la ong, kane ka jingdawa ïa ka Sorkar Jylla bad ka tnad Shipai, ka dei namar kiba sah be-aiñ ha Lum Survey ki dei kiba khlaiñ bha ban khaïi ïa u drok ha sor Shillong.
U la pynkynmaw naduh ba ka seng ka la leit ban kyndang ha u bnai Ïaïong, 2024 ka la lap kumba 80 tylli ki ïing kiba sah be-aiñ, kumjuh ruh haba la leit jurip lang da ki bor pynïaid district, ka tnad Shipai, Municipal la lap ba kine ki briew ki shong be-aiñ khlem kot khlem sla.
Shuh shuh u la buh jingkylli balei ka Sorkar Jylla bad ka tnad Shipai kim lah ban weng ïa ki ïing kiba sah be-aiñ haba ki don tang lai tylli ki trai dukan kiba leit ujor sha ïingbishar.
U Bah Roykupar u la pynkynmaw ba ha kine ki ar snem haba ki pulit ki leit ban khynra drok ki lap ba bun dei na Lum Survey, nangta kine ki briew ki ring tuh ïa ka bording, hynrei ka MECL ka shu leh mynleh tang hakhmat ka seng hynrei mynta kam patiaw shuh.
“Lada ïa ki briew jong ngi lada ki shong tam khyndiat harud surok, ki la shah kyndang da kaba ai nuksa kum ha lad Umroi hynrei balei kim kyndang ïa ki 80 tylli ki ïing kiba sah be-aiñ ha Lum Survey kaba dei ka jaka ba jyllei u drok,” u la ong.
Shuh shuh u la ban biang ba aiu kan jia lada ka seng kan ïalam ïa ki dkhot ka jaidbynriew ban leit skud ha jaka Sorkar lada ïa ki briew kiba sah be-aiñ ha Lum Survey ka Sorkar kam leh eiei.
U la suba jur ba ka jingïoh sah be-aiñ ha Lum Survey ka lah ban dei namar ki pynïaid ïa u drok da ki spah klur ha sor Shillong.
Kumta u la phah ïa ka khubor sha ka Sorkar Jylla ba ka dei ban shimkhia mardor lada kim leh eiei ka seng kan sa shim ki sienjam ban pynduh jait ïa u drok.
