Shillong, Naitung 09
Ki nongdie jingdie kiba dei ki trai Jylla kiba don dukan bapher-bapher ha kylleng ka nongbah Shillong, ki la mih shakhmat ban pynpaw ïa ka jingkynduh jingeh, ka jingsyrtok na ka daw ka jingwan rung ka Blinkit bad ban pynshai ruh haba ïadei kaba ki la shah kynnoh.
Haba ïakren sha ki nongthoh khubor u Bah Andrew Nongkynrih u la ïathuh ba ka Blinkit ka wan nyngkong ha u bnai Nailur jong u snem ba la dep bad pynpaw ba naduh ba wan katei ka kompeni ka ïew ïadie ïathied ki nongshong dukan ka la sdang ban hiar bad kaba la pynkynduh jingeh ïa kiba shong dukan ha Nongbah Shillong.
U la ïathuh ba ki nongshong dukan ba ha kylleng ka nongbah Shillong ki don haduh kumba 4,000 tam khlem pat kheiñ ïa ka ïew, hynrei lada kheiñ ïa ki briew kiba ïoh kam ha kitei ki dukan kiba kynthup naduh ki nongtrei, kiba kit mar, kiba pynpoi mar bad kiwei, kiba shah ktah na ka jingwan kine ki kompeni ba nabar ka la poi da ki lak ngut lane kumba 20% na ka jingbun paid jong ka nongbah Shillong.
“Ka jingwan kine ki kompeni baheh nabar, ym dei ba shah ktah tang ki nongshong dukan, ki nongtrei, kiba pynpoi mar, hynrei ka ktah wat haduh ki nongrep ruh kiba pynmih ïa ki mar rep” la ong u Bah Nongkynrih.
Nalor kaba ki nongshong dukan ki ai kam ai jam ïa ki khun samla bad kyrshan ïa ki mar rep kiba pynmih da ki briew lajong, u la ong ruh ba ki nongshong dukan ki siew ruh ïa ka GST, ki siew ïa ka bai bording ilektrik sha ka Sorkar bad lada ïanujor ïa kiwei ki kam khaïi ka heh bha ka jingïoh ka Sorkar.
Shuh-shuh u la ong ba ka jingailad ka jingwan ka Blinkit kaba ai jingshakri lut ïa kat kaba donkam ki nongthied ka pynduhnong bad pynïap bylla ïa ki briew ba na ka Jylla.
