Shillong, Naitung 09
Ka Hill State People’s Democratic Party (HSPDP) ha ka sngi Palei jong ka taïew ka la ai khublei ïa u Myntri Rangbah ka Jylla, u Conrad K Sangma halor ka jingkren shai ka Sorkar ba kam don jingthmu ban shah tih Uranium ha Meghalaya.
U President ka HSPDP, u Bah KP Pangniang u la ong ba kane ka jingkren u Myntri Rangbah ka Jylla kum kaba ‘tyngeh bad ka por kaba dei’ bad ong ba ka wanrah ïa ka jingshai kaba donkam halor kane ka kam kaba ka sahteng la slem bah.
“Ngi sngewkmen bad sa shisien ngi ai khublei ïa u Myntri Rangbah ka Jylla halor kane ka jingïeng skhem bad shim rai ba mar-mar. Ngi pyntip ruh sha baroh ki nongshong shnong ka Jylla, ba ka Sorkar kam don kano-kano ka jingthmu ban tih Uranium hapoh ka Jylla Meghalaya,” la ong u Bah KP Pangniang.
U la ong ruh ba ka party ka pdiang ïa kaei ba ka Sorkar ka ïeng namar kadei kaba ïahap bad ka jingpyrshah kaba la slem bha jong ka HSPDP.
“Sa shisien bad ban biang, kum ka party ngim lah ban len ba ngi pyrshah ban tih ïa u marpoh khyndew Uranium ha ka Jylla. Kane kadei naduh ki nongïalam, ha ka por jong u Bah Hopingstone Lyngdoh, uba la pynleit jingmut bha ïa kane ka mat,” la ong u Bah Pangniang.
Da kaba kdew ïa ka Sorkar, ba ha u bnai Nailar (August) 2016, ka party ka la phah ïa ka momerandom sha ka Sorkar MUA-2 ba la ïalam da u Dr.Mukul Sangma.
“Hadien kata, ka Sorkar ka la shim ïa ka rai ban wengnoh ïa baroh ki jingmynjur haba ïadei bad u Uranium ha ka Jylla Meghalaya. Ki la rai ruh ban pynsangeh ïa baroh ki jingthmu tih Uranium ha Domiasiat ha South West Khasi Hills District bad ban bteng ban pynsangeh noh ïa baroh ki jingthmu tih Uranium ha Jylla. Kum ka party, ngi ai khublei ïa ka Sorkar Jylla ha katei ka por,” u la ong.
U Bah KP Pangniang haba kren sha ki lad pathai khubor u la ong, ba ka jingkren u Myntri Rangbah ka paw shai ba ka Sorkar kan nym don kano-kano ka jingthmu tih ïa u Uranium ha ka Jylla
“Nga ïohi hynnin ka sngi ha ki lad pathai khubor, ba u Myntri Rangbah ka Jylla, u la krenshai ba kam don kano-kano ka jingïakren halor u Uranium. Ngi ruh ngi kyrmen ba kane ka Sorkar ba mynta hapoh ka jingïalam u Conrad K Sangma, kin ïeng beit ha kajuh ka nongrim,” la bynrap u Bah KP Pangniang.
