Mairang, Naitung 09
U MLA ka Mairang Konstitwensi Bah Metbah Lyngdoh uba dei ruh u Myntri ha ka Sorkar Jylla ha ka sngi Ba-ar jong ka taïew u la leit ban jurip ïa ka Eklavya Model Residential School (EMRS) kaba don ha ka shnong Mawlyntriang, Mairang C&RD Block.
Ha kane ka jingleit jurip la synran lang ïa u Bah Metbah da u MDC ka Mairang Konstitwensi Bah Equator Nongrang, ka Deputy Commissioner EWKHD Kong Anita Kharpor, u ADC Bah M Diengdoh, u SDSEO Bah J Thyrniang lem bad kiwei ki ophisar Sorkar, ki Nongïalam shnong bad kiwei kiwei.
Haba kren ha ki nongthoh khubor hadien ba la dep jurip ïa ka jingpyntrei ïa katei ka skul u Bah Metbah u la ong, ka jingwan jurip ka long ban peit bniah halor ka jingpyntyllun ïa ka rukom treikam bad ka jingshna ïa kane ka skul kan long kaba ïaid beit ïaid ryntih.
U Bah Metbah u la ong ruh ba ka jingtrei ka la ïaid shaid-shaid bad mynta la lah ban pyndep haduh kumba 90-95 percent bad ïa kane ka skul la buh ïa ka thong ban pyndep noh ha u bnai Nailar bad ka jingai ‘admission’ ruh yn sa sdang noh shen.
U la ong ruh ba kane ka skul kan long ka jingmyntoi na ka bynta kito ki bym kot bor bad ka thong kaba hakhmat eh ka long ban ai ‘admission’ ïa ki khynnah skul kiba na ka thaiñ Mairang Block. Ym tang katta, u la ong ruh ba ha kane ka skul ki khynnah kin ym donkam ban siew ïa ka bai skul ne ka bai hostel kaba ka jinglut ka kot kumba 1.20 lak ne 1.30 lak shi snem bad ïa kine baroh ki jinglut la siew da ka Sorkar Pdeng kynthup ïa ka bam ka dih bad ki jaka sah.
Nalorkata u la ong ruh ba lyngba kane ka skul kan long ruh ka jingmyntoi ha ka ïohkam ïohjam ki samla na kane ka dong ka thaiñ ba kin lah ban trei ha kane ka skul ha ki kam bapher-bapher.
