Shillong, Naitung 09
Ka Hill State People’s Democratic Party (HSPDP) ha ka sngi Palei ka la pynbna ba kan nym kyrshan satia ïa u kyrtong ba la pynïeng da ka United Democratic Party (UDP) kaba ïatreilang ha ka Regional Democatic Party (RDA) ha ka ilekshon MP shiteng samoi.
U President ka HSPDP, u Bah KP Pangniang u la ong ba ïa kane ka rai la shim hadien ka jingïakren hapoh ïing, haba kdew ïa ka jingduna ka por ban sei ïa la u jong u kyrtong bad ka jingmih ka jingïapher jingmut ïa u kyrtong monlang ka RDA.
“Ngin nym ïakhun ha kane ka ilekshon shiteng samoi sha Lok Sabha Parliamentary Konstitwensi,” la ong u Bah Pangniang.
U la pynkynmaw ba ka HSPDP ka la kyrshan ïa u kyrtong ka UDP kaba la sei hapoh ka lama jong ka Regional Democratic Alliance (RDA) ha kine ki ar tylli ki ilekshon ba la dep.
“Hooid, ngi dei shibynta jong ka RDA. Ngi ruh ngi kyrshan ïa u kyrtong ka UDP hapoh ka lama jong ka RDA ha kine ki ar tylli ki ilekshon. Hynrei ha kane ka por ba mynta, na ka liang jong ngi, ngi kren shai ba ngin nym kyrshan ïa u kyrtong ka UDP,” u la ong.
U Bah Pangniang u la ong, ba ka party ka kwah ban sei ïa la u jong u kyrtong, hynrei kam shym la poi ha ka jingïamonlang hapoh ka RDA.
“Ka daw ka long ba na ka liang ka party jong ngi, hadien ka jingïakren, ngi kwah ban pynïeng ïa la u jong u kyrtong ha ka shap jong ka party. Hynrei ngim shym la poi ka jingïasngewthuh jingmut hapoh ka RDA,’ u la ong.
“Ngi ruh ngi pyrshang ba lada ki ar party hapoh ka RDA ki lah ban ïa wan lang, ngi lah ban pynïeng ïa la u jong u kyrtong da ka shap ïamon. Ngi pyrshang ban ïakren bha halor kane ruh. U la ong haba pynshai ba kane ka sienjam kam dei satia kaba la ïamynjur naba ka UDP ka la pyrshah,” u la bynrap.
“Kam dei ka jingpyrshah. Kadei ka jingkwah jong ka party. Hynrei ngim shym la lah ban pynbeit ïakata namar ba ka por ruh ka la lyngkot,” bynrap biang u Bah KP Pangniang.
U Bah Pangniang u la ong ba ka party kan pan jingmut na ki district bad ki Konstitwensi jong ka, ba kumno ban leh ïa kane ka ilekshon shiteng samoi ban wan.
“Ha kaba ïadei bad kane ka kam, ngin ïamir jingmut bad ngin ieh ruh ha ka jingstad jong ki nongtrei ka party ha ki District, Konstitwensi, bad Primary Unit Level jong ka party, ban rai kumno ban kyrshan ïa u MP ha ka by-election, namar ba ngim shym la ïoh lad ban pynïeng ïa la u jong u kyrtong,” u la ong.
“Ïa mynta kam pat don kano-kano ka jingïakren badno badno ruh, ïano ban kyrshan ne ban nym kyrshan. Ngi skhem ruh ha ka jingpyrkhat jong ngi, ba namar ba ngim don la u jong u kyrtong, kum ka party ngim shym la rai ban kyrshan ïano ïano ruh. Ngi ieh ha ka jingstad jong ki nongïalam bad ki nongtrei ka party ha ki district bad Konstitwensi.” u la ong shuh shuh.
