Shillong, Naitung 09
Ka Khun Hynñiewtrep National Awakening Movement (KHNAM) ka pynpaw ba ka long ka jingma kaba khraw ïa ka jaidbynriew haba ïadei ka jingïohlad long rangbah shnong kiwei ki jaidbynriew bym dei Khasi hapoh Raid Marwet, Ri-Bhoi District.
Haba kren sha ki nongthoh khubor ha ka Sngi Balang u Working President ka KHNAM u Bah Thomas Passah u la pynpaw ba ka party ka la ju kren bad ju phah jingthoh ruh ha ki snem ba la dep sha ka Executive Committee ka KHADC ba la leit ban pynpaw ïa ka jingsngewkhia haba ïadei kane ka kam.
U la ong ba ha u bnai Ïaïong 2025 ka party ka la phah jingthoh sha kane ka EC ba mynta ban shimkhia ban pynbeit haba ïadei kane ka jingkam rangbah shnong ki jaidbynriew Garo kaba long pyrshah ruh ïa ka Mylliem Act 2007.
“Ngi la pyntip halor ka jingdon jong ki jaidbynriew Garo kiba kam Rangbah Shnong ïalade ha ki shnong kum ka Maikholi, Pillangkatta A, longkhuli, Mawiong, Gambalbari, Jyrmang, Jolsyiem, Rangsakona, Chibra, Nongspung A bad Nongspung C, ha kaba ki la soi ruh ïa ki kot ïadie ïathied jaka, kaba long ka jingmynsaw ïa ka jaidbynriew” la ong u Bah Passah.
U Bah Passah u la ïathuh ba ka KHNAM ka la kyntu ïa ka KHADC ba kan shimkhia ban leh eiei haba ïadei kane ka jingkam rangbah shnong hi kiwei ki jaidbynriew khlem da ïoh ïa ka Sanad pynskhem na ka Hima bad u la pynkynmaw ruh ba ka kynhun jong kine kiba kam rangbah shnong ïalade ki la leit ban ïakynduh ïa u Myntri Rangbah u Conrad K Sangma ban phah tuklar lem, ha kaba u Myntri Rangbah ruh u la kyntu ïa ki ban leit ïa pynbeit bad ka KHADC kaba don ïa ka bor ban pynbeit ïa kane ka bynta.
Nalor kata u la buh ka jingkyntu ïa ka KHADC ba kan shimkhia ïa kane bad ban pynshitom ïa ki briew kiba la pynkheiñ ïa ka Mylliem Act 2007.
U la bynrap ba ka KHNAM ka ai ka jingkyrshan halor ka jingkyntu jong ka seng Hynñiewtrep National Youth Movement ïa ka KHADC ban shimkhia halor ka jingkam Rangbah Shnong jong ki jaidbynriew Garo hapoh ka thaiñ Raid Marwet, Ri-Bhoi District.
