Jowai, Naitung 09
U Myntri Rangbah ka Jylla Assam, u Himanta Biswa Sarma, u la kit ïa ka khubor jingïaieid bad jingïatylli na ka Jylla Assam sha ki paidbah ka Meghalaya, khamtam sha ki nongshong shnong ka Ri-lum Jaiñtia, haba u la wan sakhi ïa ka sngi pynkut jong ka lehniam Behdienkhlam ha Jowai ha ka 9 tarik Naitung.
Haba ai jingkren, u Sarma u la ong ba kane ka dei ka sien kaba nyngkong eh ba u wan ban sakhi ïa ka lehniam Behdienkhlam bad u la pynpaw ïa ka jingsngew-kmen kaba khraw.
“Kane ka dei ka sien kaba nyngkong ba ngan wan ban sakhi ïa kum kane ka lehniam. Nga dap da ka jingkmen ban don hangne. Ngam pat ju ïohi ïa kum kane ka jinglehniam mynno-mynno ruh,” u la ong.
U la ong ruh ba u wanrah ïa ka khubor ka jingïaieid na ka Jylla Assam sha ki paidbah ka Meghalaya bad u la kitbok kitrwiang ba ka lehniam kan ïai long kaba jop bad kaba seisoh.
Haba kren sha ki lad pathai khubor, u Sarma u la ong ba kam don ka jingïakynad kaba jur hapdeng ka Assam bad Meghalaya.
“Ngam tharai ba ki don ki jingïakynad kiba ju jia man ka por. Baroh la pynbeit bha bad baroh ki ïaid beit ïaid ryntih,” u la ong.
Halor ka jingïakren ban pynbeit ïa u pud u sam, u Sarma u la ong ba ka jingïakren hapdeng ki ar tylli ki Sorkar ka dang ïai bteng.
“Nga ju ïakynduh ïa u Myntri Rangbah bad u Symbud Myntri Rangbah ka Meghalaya. Ka lad jingïakren ka plie beit bad lada mih kano-kano ka jingeh, ngi pynbeit ïa ka mardor da ka mynsiem jingïalong paralok,” u la ong.
Ka jingong jong u Sarma ka wan ha ka por ba ka Sorkar Meghalaya ka la pynbeit thymmai ïa ki Regional Committee ban pynïaid shakhmat ïa ka jingïakren jong ka wat kaba ar bad ka Assam halor ki hynriew tylli ki jaka jingïakajia pud kiba dang sah.
Ha u bnai Lber 2022, ka Assam bad Meghalaya ki la soi ïa ka jingïateh jingïasngewthuh ban pynbeit ïa ki hynriew na ki 12 tylli ki jaka jingïapher jingmut halor u pud u sam.
Ki jaka kiba dang sah ban ïakren ha ka wat kaba ar ka kynthup ïa ka Langpih, Borduar, Nongwah-Mawtamur, Deshdemoreah, Block I, Block II bad Psiar-Khanduli.
Haba pynpaw ïa ka jingsngewtynnad ïa ka Meghalaya, u Sarma u la ong ba un sa wanphai biang sha Jowai.
“Ngan sa wan biang bad ngan ïashim bynta ruh ha ka jinglehkmen. Ha ka sien kaba bud ngan sa rung ruh shapoh ka pung,” u la ong.
